ಬೆಂಗಳೂರು: ಐಪಿಎಲ್ 2024 ರಲ್ಲಿ ಇಂದು ಈಗಾಗಲೇ ಸೋತು ಪ್ಲೇ ಆಫ್ ನಿಂದ ಹೊರಬಿದ್ದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧ ಔಪಚಾರಿಕ ಪಂದ್ಯವಾಡಲಿದೆ.
ಆರ್ ಸಿಬಿ ಕಳೆದ 8 ಪಂದ್ಯಗಳಿಂದ ಕೇವಲ 1 ಗೆಲುವು ಸಾಧಿಸಿದೆ. ಸತತವಾಗಿ ಸೋಲುತ್ತಲೇ ಬಂದಿರುವ ಆರ್ ಸಿಬಿ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದ್ದು, ಈಗಾಗಲೇ ಪ್ಲೇ ಆಫ್ ರೇಸ್ ನಿಂದ ಹೊರಬಿದ್ದಿದೆ. ಆರ್ ಸಿಬಿಗೆ ಇದು ಆಟಕ್ಕುಂಟು ಲೆಕ್ಕಕ್ಕಿಲ್ಲದ ಪಂದ್ಯ.
ಈ ಟೂರ್ನಿಯುದ್ದಕ್ಕೂ ಆರ್ ಸಿಬಿಗೆ ಕಾಡಿರುವುದು ಬೌಲಿಂಗ್. ಇದುವರೆಗೆ ಬೌಲರ್ ಗಳಿಂದ ಉತ್ತಮ ಪ್ರದರ್ಶನ ಬಂದಿಲ್ಲ. ಎಲ್ಲಾ ತಂಡಗಳ ವಿರುದ್ಧವೂ ಹೊಡೆಸಿಕೊಂಡಿದ್ದೇ ಬಂತು. ಆದರೆ ಬ್ಯಾಟಿಗರು ಮಿಂಚಿದ್ದು ಇದೆ. ಅದಕ್ಕೆ ಕಳೆದ ಪಂದ್ಯದಲ್ಲಿ ದೊಡ್ಡ ಮೊತ್ತ ಬೆನ್ನತ್ತಿ ಕೇವಲ 1 ರನ್ ನಿಂದ ಸೋತಿದ್ದು ನಿದರ್ಶನ.
ಇತ್ತ ಸನ್ ರೈಸರ್ಸ್ ಹೈದರಾಬಾದ್ ಈ ಟೂರ್ನಿಯಲ್ಲಿ ದಾಖಲೆಗಳ ಮೇಲೆ ದಾಖಲೆ ಮಾಡುತ್ತಾ ರನ್ ಬೆಟ್ಟವನ್ನೇ ರಾಶಿ ಹಾಕುತ್ತಿದೆ. ಆರಂಭಿಕ ಟ್ರಾವಿಸ್ ಹೆಡ್ ಒಬ್ಬರೇ ಎದುರಾಳಿಗಳನ್ನು ಮಣ್ಣುಮುಕ್ಕಿಸಬಲ್ಲರು. ಅವರ ಜೊತೆಗೆ ಅಭಿಷೇಕ್ ಶರ್ಮ, ಹೆನ್ರಿಚ್ ಕ್ಲಾಸನ್ ಸೇರಿದಂತೆ ಹೈದರಾಬಾದ್ ಬೀಡು ಬೀಸಾದ ಬ್ಯಾಟಿಂಗ್ ಮೂಲಕ ಈ ಕೂಟದಲ್ಲಿ ಎಲ್ಲಾ ತಂಡಗಳ ಬೌಲರ್ ಗಳನ್ನೂ ಚೆಂಡಾಡಿದೆ.
ಅದರಲ್ಲೂ ಈ ಪಂದ್ಯ ನಡೆಯುತ್ತಿರುವುದು ಬೆಂಗಳೂರಿನಲ್ಲಿ. ಇಲ್ಲಿನ ಚಿಕ್ಕ ಮೈದಾನದಲ್ಲಿ ಆರ್ ಸಿಬಿಯ ಪೇಲವ ಬೌಲಿಂಗ್ ಎದುರು ಹೈದರಾಬಾದ್ ಯಾವ ಮಟ್ಟಿಗೆ ಎರಗಬಹುದು ಎಂದು ನೆನೆಸಿಕೊಂಡೇ ಅಭಿಮಾನಿಗಳು ಚಿಂತೆಗೀಡಾಗಿದ್ದಾರೆ. ಮಾನ ಉಳಿಸಿಕೊಳ್ಳಲು ಆರ್ ಸಿಬಿಗೆ ಈಗ ಗೆಲುವು ಅನಿವಾರ್ಯವಾಗಿದೆ. ಈ ಪಂದ್ಯ ಸಂಜೆ 7.30. ಕ್ಕೆ ಆರಂಭವಾಗಲಿದೆ.
