ಬೆಂಗಳೂರು: ಇದೀಗ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಪುಟ್ಟಕ್ಕನ ಮಕ್ಕಳು ಧಾರವಾಹಿಯಲ್ಲಿ ಲಾಯರ್ ಪಾತ್ರಧಾರಿಯಾಗಿರುವ ಕನ್ನಡ ಕಿರುತೆರೆ ನಟಿ ಇಶಿತಾ ವರ್ಷ ಬಗ್ಗೆ ಇಂಟ್ರೆಸ್ಟಿಂಗ್ ಸಂಗತಿಗಳು ಇಲ್ಲಿವೆ.
ನೋಡಲು ಥೇಟ್ ಬಾಲಿವುಡ್ ನಟಿ ರಾಣಿ ಮುಖರ್ಜಿಯ ಹೋಲಿಕೆಯಿರುವ ಇಶಿತಾ ಇದೀಗ ಕಿರುತೆರೆ ವೀಕ್ಷಕರ ಮೆಚ್ಚಿನ ನಟಿಯಾಗಿದ್ದಾರೆ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಅಗ್ನಿಸಾಕ್ಷಿ ಧಾರವಾಹಿ ಮೂಲಕ ಕಿರುತೆರೆ ಪ್ರೇಕ್ಷಕರಿಗೆ ಇಶಿತಾ ಪರಿಚಯವಾದರು. ಈ ಧಾರವಾಹಿಯಲ್ಲಿ ಮಾಯ ಎನ್ನುವ ಪಾತ್ರ ಮಾಡುತ್ತಿದ್ದರು ಇಶಿತಾ.
ಬಳಿಕ ಕಲರ್ಸ್ ಕನ್ನಡ ವಾಹಿನಿಯ ರಿಯಾಲಿಟಿ ಶೋನಲ್ಲೂ ಭಾಗಿಯಾಗಿದ್ದರು. ಇಶಿತಾ ಮದುವೆಯಾಗಿರುವುದು ಖ್ಯಾತ ಕೊರಿಯಾಗ್ರಾಫರ್ ಮುರುಗ ಅವರನ್ನು. ಗಂಡನ ಜೊತೆಗೆ ಇಶಿತಾ ಕಲರ್ಸ್ ಕನ್ನಡ ರಿಯಾಲಿಟಿ ಶೋನಲ್ಲಿ ಭಾಗಿಯಾಗಿದ್ದರು. ಸ್ವಾರ್ಥರತ್ನ ಎನ್ನುವ ಸಿನಿಮಾ ಮೂಲಕ ಸ್ಯಾಂಡಲ್ ವುಡ್ ಗೂ ಕಾಲಿಟ್ಟರು.
ಕೇವಲ ನಟನೆ ಮಾತ್ರವಲ್ಲದೆ, ಇಶಿತಾಗೆ ವೈಲ್ಡ್ ಲೈಫ್ ಫೋಟೋಗ್ರಫಿ ಎಂದರೆ ಅಚ್ಚುಮೆಚ್ಚು. ಇತ್ತೀಚೆಗಂತೂ ನಟನೆಯನ್ನೂ ಬಿಟ್ಟು ಕಾಡು ಮೇಡು ಸುತ್ತಿಕೊಂಡು ಅಪರೂಪದ ಫೋಟೋಗಳನ್ನು ಸೆರೆಹಿಡಿಯುವಲ್ಲಿ ನಿರತರಾಗಿದ್ದರು. ಇದೀಗ ಪುಟ್ಟಕ್ಕನ ಮಕ್ಕಳು ಧಾರವಾಹಿ ಮೂಲಕ ಮತ್ತೆ ಕನ್ನಡ ಕಿರುತೆರೆಗೆ ಬಂದಿದ್ದು, ಇದು ಅತಿಥಿ ಪಾತ್ರವಾದರೂ ಇಶಿತಾರನ್ನು ನೋಡಿ ವೀಕ್ಷಕರು ತುಂಬಾ ಖುಷಿಯಾಗಿದ್ದಾರೆ.
