ರೋಮ್: ಪ್ರವಾಸದಿಂದ ಹಿಂತಿರುಗುತ್ತಿದ್ದ ಇಟಲಿ ಪ್ರಜೆಗಳನ್ನು ತುಂಬಿದ್ದ ಪ್ರವಾಸಿ ಬಸ್ ಹೆದ್ದಾರಿಯಿಂದ ಕಮರಿಗೆ ಉರುಳಿ 37 ಜನರು ಮೃತಪಟ್ಟ ಘಟನೆ ಇಟಲಿಯಲ್ಲಿ ಭಾನುವಾರ ರಾತ್ರಿ ಸಂಭವಿಸಿದೆ.
ಭಾರೀ ವಾಹನದಟ್ಟಣೆಯಿಂದ ವೇಗ ತಗ್ಗಿಸಿದ್ದರಿಂದ ಅನೇಕ ಕಾರುಗಳಿಗೆ ಡಿಕ್ಕಿ ಹೊಡೆದ ಬಸ್ ಕಮರಿಗೆ ಬಿದ್ದಿತು. ನೇಪಲ್ಸ್ ಹೊರಗೆ ಅವೆಲಿನೋ ಬಳಿ ಸಂಕೇತಗಳನ್ನು ತೋರಿಸಿ, ವಾಹನಗಳು ನಿಧಾನಗೊಳ್ಳುವ ಬಗ್ಗೆ ಎಚ್ಚರಿಕೆ ನೀಡಲಾಗಿತ್ತು ಎಂದು ಹೆದ್ದಾರಿ ಪೊಲೀಸರು ಮತ್ತು ಅಧಿಕಾರಿಗಳು ತಿಳಿಸಿದ್ದಾರೆ. ಬಸ್ ಚಾಲಕ ತನ್ನ ವಾಹನದ ಮೇಲೆ ನಿಯಂತ್ರಣ ಕಳೆದುಕೊಂಡು ಕಮರಿಗೆ ಬಿದ್ದಿರಬಹುದು ಎಂದು ಅವರು ಶಂಕಿಸಿದ್ದಾರೆ.
ಅಪಘಾತವಾಗಿ ಗಂಟೆಗಳ ನಂತರ, 37 ದೇಹಗಳನ್ನು ಹೊರತೆಗೆದಿರುವುದಾಗಿ ಅಗ್ನಿಶಾಮಕ ಸಿಬ್ಬಂದಿ ಹೇಳಿದ್ದಾರೆ. ಮೃತರಲ್ಲಿ ಬಹುತೇಕ ಜನರು ನಜ್ಜುಗುಜ್ಜಾದ ಬಸ್ಸಿನ ಪಕ್ಕದಲ್ಲಿ ಬಿದ್ದಿದ್ದರು. ಕೆಲವು ಮೃತದೇಹಗಳನ್ನು ಅವಶೇಷಗಳಿಂದ ಹೊರತೆಗೆಯಲಾಗಿತ್ತು ಎಂದು ಇಟಲಿ ಸುದ್ದಿಸಂಸ್ಥೆ ಆನ್ಸಾ ವರದಿ ಮಾಡಿದೆ. 11 ಜನ ಗಾಯಾಳುಗಳನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ. ಅವರಲ್ಲಿ ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ.
