ಲಿಬಿಯಾದ ಟ್ರಿಪೋಲಿಯಲ್ಲಿನ ಫ್ರಾನ್ಸ್‌ ರಾಯಭಾರಿ ಕಚೇರಿಯಲ್ಲಿ ಕಾರ್ ಬಾಂಬ್ ಸ್ಫೋಟಿಸಿದ ಈರ್ವರು ಫ್ರೆಂಚ್‌ ಭದ್ರತಾ ಸಿಬ್ಬಂದಿ ಗಾಯಗೊಂಡಿದ್ದು, ದೂತಾವಾಸದ ಕಟ್ಟಡಕ್ಕೆ ಭಾರೀ ಹಾನಿ ಸಂಭವಿಸಿದೆ.
ಸ್ಥಳೀಯ ಕಾಲಮಾನ ಪ್ರಕಾರ ಬೆಳಗ್ಗೆ ಗಂಟೆ 7.30ರ ಸುಮಾರಿಗೆ ಕಾರ್ ಬಾಂಬ್ ಸ್ಫೋಟಗೊಂಡಿದ್ದು, ಫ್ರಾನ್ಸ್‌ ದೂತಾವಾಸ ಕಚೇರಿಯನ್ನು ಹೊಂದಿರುವ ಕಟ್ಟಡದ ಸುತ್ತಲಿನ ಆವರಣ ಗೋಡೆ ಸಂಪೂರ್ಣ ನಾಶವಾಗಿದ್ದು, ರಾಯಭಾರಿ ಕಚೇರಿ ಕಟ್ಟಡಕ್ಕೂ ಭಾರೀ ಹಾನಿ ಸಂಭವಿಸಿದೆ. ದೂತಾವಾಸ ಕಚೇರಿ ಬಳಿ ಪಾರ್ಕಿಂಗ್‌ ಮಾಡಲಾಗಿದ್ದ ಎರಡು ಕಾರುಗಳೂ ಸ್ಫೋಟದಿಂದಾಗಿ ನಾಶವಾಗಿವೆ.
ಲಿಬಿಯಾದಲ್ಲಿನ ತನ್ನ ದೂತಾವಾಸ ಕಟ್ಟಡದ ಮೇಲೆ ಬಾಂಬ್ ದಾಳಿ ನಡೆದಿರುವುದನ್ನು ದೃಢಪಡಿಸಿರುವ ಫ್ರಾನ್ಸ್‌ನ ಮೂಲಗಳು, ಸ್ಫೋಟದಲ್ಲಿ ಈರ್ವರು ಭದ್ರತಾ ಸಿಬ್ಬಂದಿ ಗಾಯಗೊಂಡಿದ್ದು, ಓರ್ವನಿಗೆ ಗಂಭೀರ ಗಾಯಗಳಾಗಿವೆ ಎಂದು ತಿಳಿಸಿವೆ.
