ಅಮೆರಿಕದ ಉನ್ನತ ಸಂಸತ್ ಸದಸ್ಯರು ಶುಕ್ರವಾರ ಜನಪ್ರಿಯ ಎಚ್-1ಬಿ ವೀಸಾ ಕಾರ್ಯಕ್ರಮವನ್ನು ಕುರಿತು ತರಾಟೆಗೆ ತೆಗೆದುಕೊಂಡರು. ಕಂಪನಿಗಳು ಎಚ್-1ಬಿ ವೀಸಾ ಕಾರ್ಯಕ್ರಮವನ್ನು ದುರುಪಯೋಗ ಮಾಡಿಕೊಂಡು ಅಮೆರಿಕನ್ನರ ಬದಲಿಗೆ ಭಾರತ ಸೇರಿದಂತೆ ಇತರೆ ರಾಷ್ಟ್ರಗಳಿಂದ ಕಡಿಮೆ ವೇತನಕ್ಕೆ ವಿದೇಶಿ ನೌಕರರನ್ನು ಬದಲಿಸುತ್ತಿವೆಯೆಂದು ಅವರು ಟೀಕಿಸಿದರು.
ವಾಸ್ತವವೇನೆಂದರೆ ಅರ್ಹತೆ ಹೊಂದಿದ ಅಮೆರಿಕದ ನೌಕರರಿದ್ದೂ ಕೂಡ ಸಾವಿರಾರು ಅಮೆರಿಕ ನೌಕರರಿಗೆ ಬದಲಿಗೆ ವಿದೇಶಿ ಕಾರ್ಮಿಕರನ್ನು ನೇಮಿಸಲಾಗುತ್ತಿದೆ ಎಂದು ಸೆನೆಟ್ ಸದಸ್ಯ ಜೆಫ್ ಸೆಷನ್ಸ್ ಸಂಸತ್ತಿನ ಕಲಾಪದಲ್ಲಿ ಆರೋಪಿಸಿದರು.
ಅಮೆರಿಕದಲ್ಲಿ ಕುಶಲ ಕಾರ್ಮಿಕರ ಕೊರತೆಯಿದ್ದು, ಅದಕ್ಕಾಗಿ ಅರ್ಹ ವಿದೇಶಿ ನೌಕರರನ್ನು ಭಾರತದಿಂದ ತರಲಾಗುತ್ತಿದೆ ಎಂಬ ಅನೇಕ ಅಮೆರಿಕ ಕಂಪನಿಗಳ ವಾದವನ್ನು ಸೆಷನ್ಸ್ ನಿರಾಕರಿಸಿದರು.
ಉನ್ನತ ವಿದ್ಯಾಭ್ಯಾಸ ಪಡೆದ ಅಮೆರಿಕದ ವೃತ್ತಿಪರರ ಕೊರತೆಯಿಲ್ಲವೆಂದು ದತ್ತಾಂಶ ತೋರಿಸುತ್ತಿದೆ. ಇದಲ್ಲದೇ ಅಮೆರಿಕದ ಸ್ಟೆಮ್ ಕಾಲೇಜು( ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ) ಪದವೀಧರರ ಕೊರತೆಯಿಲ್ಲ ಎನ್ನುವುದನ್ನು ದತ್ತಾಂಶ ತೋರಿಸುತ್ತದೆ ಎಂದು ಹೇಳಿದರು.
ವಲಸೆ ವೀಸಾ ಕಾರ್ಯಕ್ರಮವು ಅಮೆರಿಕದ ನೌಕರರ ಶಕ್ತಿಗೆ ಪೂರಕವಾಗಿರಬೇಕು, ಪ್ರಸಕ್ತ ಕಾನೂನುಗಳು ಅಮೆರಿಕದ ನೌಕರರಿಗೆ ಅನನುಕೂಲವಾಗುವಂತೆ ದುರುಪಯೋಗ ಮಾಡದಂತೆ ನಾವು ಖಾತರಿಪಡಿಸಬೇಕು ಎಂದು ಹೇಳಿದರು.
