ಬೆಂಗಳೂರಿನ ಕಸ ಸಮಸ್ಯೆಗೆ ಬಿಬಿಎಂಪಿಗೆ ಸಲಹೆ ನೀಡಿದ ನಟ ಅನಿರುದ್ಧ್

ಬೆಂಗಳೂರು: ಕಸ ಸಮಸ್ಯೆ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಕಳ ಕಳಿ ವ್ಯಕ್ತಪಡಿಸುವ ನಟ ಅನಿರುದ್ಧ್ ಈಗ ಬೆಂಗಳೂರಿನ ಕಸ ಸಮಸ್ಯೆ ಪರಿಹಾರಕ್ಕೆ ಬಿಬಿಎಂಪಿ ಮುಂದೆ ಕೆಲವು ಸಲಹೆಗಳನ್ನು ನೀಡಿದ್ದಾರೆ.

ಬಿಬಿಎಂಪಿ ಅಧಿಕಾರಿಗಳು ನಟ ಅನಿರುದ್ಧ್ ಅವರನ್ನು ಭೇಟಿ ಮಾಡಿ ಸಲಹೆ ಕೇಳಿದೆ. ಈ ಸಂದರ್ಭದಲ್ಲಿ ಕೆಲವು ಅಂಶಗಳ ಸಲಹೆಯನ್ನು ಅವರು ನೀಡಿದ್ದಾರೆ. ಅವರು ನೀಡಿದ ಸಲಹೆಗಳು ಹೀಗಿವೆ:

1. ಘನತ್ಯಾಜ್ಯ ನಿರ್ವಹಣೆ, ಸುರಕ್ಷತೆ, ಹಸಿರು ಹೊದಿಕೆಯ ಹೆಚ್ಚಳ ಮತ್ತು ಆರೋಗ್ಯ, ನೈರ್ಮಲ್ಯ ವಿಚಾರಗಳಿಗಾಗಿ ತಜ್ಞರ ಸಮಿತಿ ರಚಿಸುವುದು.
2. ಪ್ರತಿ ವಾರ್ಡ್ ನಲ್ಲೂ ವಸ್ತು ಸ್ಥಿತಿ ಮೇಲೆ ಕಣ್ಣಿಡಲು ಅಧಿಕಾರಿಗಳು, ಸೇವಾ ಪ್ರತಿನಿಧಿಗಳು, ನಾಗರಿಕರನ್ನೊಳಗೊಂಡ ಸಮಿತಿ ರಚಿಸುವುದು.
3. ನಾಗರಿಕರು ನೇರವಾಗಿ ಸಂಪರ್ಕಿಸಲು ಝೋನಲ್ ಮಾರ್ಷಲ್ ಗಳು,ಅಧಿಕಾರಿಗಳ ಸಂಖ್ಯೆಗಳನ್ನು ರಸ್ತೆ ನಾಮಫಲಕಗಳ ಮೇಲೆ ಬರೆಯುವುದು.

ಇದಲ್ಲದೇ ನಟ ಅನಿರುದ್ಧ್ ನೀಡಿದ ಇತರ ಸಲಹೆಗಳು:

1. ಘನತ್ಯಾಜ್ಯ ನಿರ್ವಹಣೆಗೆ ಪ್ಲಾಸ್ಟಿಕ್ ಬಳಕೆ ನಿಷೇಧಿಸುವುದು.
2. ಆಯಾ ವಾರ್ಡ್‍ ಗಳಲ್ಲಿ ಕಂಪೋಸ್ಟ್ ಗಳನ್ನಿಟ್ಟುಕೊಂಡು ತ್ಯಾಜ್ಯ ಸಂಗ್ರಹ ಕಂಪೋಸ್ಟರ್ ಗಳಿಗೆ ಹೋಗುವಂತೆ ನೋಡಿಕೊಳ್ಳುವುದು.
3. ಮೂಲದಲ್ಲಿಯೇ ತ್ಯಾಜ್ಯ ಬೇರ್ಪಡಿಸುವಂತೆ ನೋಡಿಕೊಳ್ಳುವುದು.
4. ತ್ಯಾಜ್ಯ ಸಾಗಿಸಲು ಮುಚ್ಚಿದ, ಯೋಗ್ಯ ವಾಹನಗಳ ಬಳಕೆ ಮಾಡುವುದು.
5. ಹೋಟೆಲ್, ಛತ್ರಗಳ ಬಳಿ ನವೀನ ಮಾದರಿಯ ಕಸದ ತೊಟ್ಟಿಗಳನ್ನಿಡುವುದು.
6. ದಿನಕ್ಕೆ ಮೂರು ಸಲ ಬೇರೆ ಬೇರೆ ಸಮಯದಲ್ಲಿ ಕಸ ಸಂಗ್ರಹಣೆಗೆ ಕ್ರಮ ಕೈಗೊಳ್ಳಬೇಕು.
7. ವಾರ್ಡ್ ಸ್ವಚ್ಛವಾಗಿಟ್ಟುಕೊಂಡ ಪೌರ ಕಾರ್ಮಿಕರಿಗೆ ಬಹುಮಾನ ಕೊಡಬೇಕು.
8. ಸುಲಭ ಶೌಚಾಲಯಗಳನ್ನು ನಿರ್ಮಿಸಿ, ಅವುಗಳ ನಿರ್ವಹಣೆ ಮಾಡಬೇಕು.
9. ಮಹಾಪೂರ ತಡೆಯಲು ರಾಜಕಾಲುವೆಗಳನ್ನು ಸ್ವಚ್ಛಗೊಳಿಸಿ ಒತ್ತುವರಿಗಳನ್ನು ತೆರವುಗೊಳಿಸಬೇಕು. ಸಾಧ‍್ಯವಾದರೆ ಕಾಲುವೆಗಳ ಮೇಲೆ ಗುಜರಾತ್ ಮಾದರಿಯಂತೆ ಸೋಲಾರ್ ಪ್ಯಾನೆಲ್ ಗಳನ್ನು ಒದಗಿಸಬಹುದು.
10. ಯಲ್ಚೇನಹಳ್ಳಿ, ಕನಕಪುರ ರಸ್ತೆ ಮೈದಾನವನ್ನು ಸ್ವಚ್ಛಗೊಳಿಸುವುದು.

ಸುರಕ್ಷತೆಗಾಗಿ ಕೈಗೊಳ್ಳಬೇಕಾದ ಕ್ರಮಗಳು:

1. ರಸ್ತೆಗಳ ಮೇಲೆ ಎಲ್ಲೆಂದರಲ್ಲಿ ತೂಗಾಡುವ ತಂತಿ, ಕೇಬಲ್ ಗಳನ್ನು ನೆಲದೊಳಗೆ ಸೇರಿಸುವುದು. ಈ ಪರಿಸ್ಥಿತಿಗೆ ಕಾರಣವಾದ ಅಧಿಕಾರಿಗಳು, ಕೇಬಲ್ ಆಪರೇಟರ್ ಗಳಿಗೆ ದಂಡ ವಿಧಿಸಬೇಕು.
2. ಸುರಕ್ಷತೆಗೆ ಆದ್ಯತೆ ಕೊಟ್ಟು ಟ್ರಾನ್ಸ್ ಫಾರಂಗಳನ್ನು ಮಾಡಬೇಕು.
3. ರಸ್ತೆಯಲ್ಲಿ ಅಡ್ಡಾಡುವ ದನಗಳಿಗೆ ಗೋಶಾಲೆಗಳಿಗೆ ಸಾಗಿಸಲು ವ್ಯವಸ್ಥೆ.
4. ಪ್ರಾಣಿ ದಯಾ ಸಂಘಗಳ ನೆರವಿನೊಂದಿಗೆ ಬೀದಿ ನಾಯಿ ಸಮಸ್ಯೆ ನಿವಾರಿಸುವುದು.
5. ರಸ್ತೆ ಗುಂಡಿಗಳು, ಪಾದಚಾರಿ ಮಾರ್ಗಗಳು, ಮೋರಿ ನಿರ್ವಹಣೆಗೆ ತಜ್ಞರ ಸಲಹೆ ಪಡೆದು ವೈಜ್ಞಾನಿಕ ವಿನ್ಯಾಸದ ಅನುಸಾರವಾಗಿ ರಚಿಸುವುದು.
6. ಸಿಸಿಟಿವಿ ಅಳವಡಿಕೆ
7. ಒತ್ತುವರಿ ಪಾದಚಾರಿ ಮಾರ್ಗಗಳ ತೆರವು.
8. ರಸ್ತೆ ಕಾಮಗಾರಿ ಪೂರ್ತಿ ಮಾಡುವುದು.

ಸೌಂದರ್ಯೀಕರಣ ಮತ್ತು ಹಸಿರು ಹೊದಿಕೆ

1. ಜಾಹೀರಾತು, ಪೋಸ್ಟರ್ ಅಳವಡಿಕೆಗೆ ನಿಷೇಧ. ಬದಲಾಗಿ ನಿರ್ದಿಷ್ಟ ಶುಲ್ಕಕ್ಕೆ ಡಿಜಿಟಲ್ ಫಲಕ ಒದಗಿಸುವುದು.
2. ಮರಗಳಿಗೆ ಮೊಳೆ, ಕಂಬಿ ಹೊಡೆಯುವುದಕ್ಕೆ ಕಡಿವಾಣ ಹಾಗೂ ದಂಡ ವಿಧಿಸುವುದು.
3. ರಸ್ತೆ ವಿಭಜಕಗಳ ನಡುವೆ ಮರ/ಗಿಡ ನೆಟ್ಟು ನೀರಿನ ಸೌಲಭ್ಯ ಒದಗಿಸುವುದು.
4. ಖಾಲಿ ಇರುವ ಜಾಹೀರಾತು ಫಲಕಗಳನ್ನು ತೆರವುಗೊಳಿಸುವುದು.
5. ಲಾಲ್ ಭಾಗ್ ನ ಕಂಪೌಂಡ್ ಗೋಡೆ ತೆಗೆದು ಎಂಎಸ್ ಗ್ರಿಲ್ ಗಳನ್ನು ಅಳವಡಿಸಿ ಜನರಿಗೆ ಚೆನ್ನಾಗಿ ಕಾಣುವಂತೆ ಮಾಡುವುದು.

ಕೆರೆಗಳ ಪುಜರುಜ್ಜೀವನ:

1. ಕೆರೆಗಳು ತ್ಯಾಜ್ಯ ಮುಕ್ತವಾಗಿರುವಂತೆ ನೋಡಿಕೊಳ್ಳಬೇಕು.
2. ಕೆರೆಗಳ ಸುತ್ತ ಗ್ರಿಲ್ ಅಳವಡಿಸಬೇಕು.
3. ಕೆರೆಗಳನ್ನು ಸ್ವಚ್ಛಗೊಳಿಸಿ, ಸುಂದರವನ್ನಾಗಿ ಮಾಡಿದ ಮೇಲೆ ಅವುಗಳ ನಿರ್ವಹಣಾ ವೆಚ್ಚಕ್ಕೆ ಆದಾಯ ಗಳಿಸಲು ಸಾಮಾಜಿಕ ಮತ್ತು ಮನರಂಜನಾ ಚಟುವಟಿಕೆಗಳಾದ ಬೋಟಿಂಗ್, ಪಾದಚಾರಿ ಪಥ, ಪಾರ್ಕ್, ಮತ್ತು ಉಪಹಾರ ಗೃಹಗಳನ್ನು ತೆರೆಯುವುದು.