ವಿದ್ಯುತ್ ಬಿಲ್ ದುಬಾರಿ: ಶವ ಸಂಸ್ಕಾರ ಶುಲ್ಕ ಹೆಚ್ಚಿಸಿದ ಬಿಬಿಎಂಪಿ

ಬಿಬಿಎಂಪಿಯು ತನ್ನ ಖಾಲಿಯಾಗಿರುವ ಖಜಾನೆಯ ಸ್ವಲ್ಪ ಭಾಗವನ್ನು ತುಂಬಿಸಿಕೊಳ್ಳಲು ನೂತನ ತಂತ್ರವನ್ನು ರೂಪಿಸಿದ್ದು, ಇನ್ನು ಮುಂದೆ ವಿದ್ಯುತ್ ಚಿತಾಗಾರದಲ್ಲಿ ಶವ ಸಂಸ್ಕಾರ ಮಾಡಲು ಸರ್ಕಾರಕ್ಕೆ ಭರಿಸಲಾಗುವ ಶುಲ್ಕದಲ್ಲಿ ಕೊಂಚ ದುಬಾರಿ ಮಾಡಿದೆ. 

ಹೌದು, ಈಗಾಗಲೇ ಬಿಬಿಎಂಪಿ ಅಧಿಕಾರಿಗಳು ಈ ಸಂಬಂಧ ಪ್ರಸ್ತಾವನೆ ಸಿದ್ಧಪಡಿಸಿ ಇಂದು ಮೇಯರ್ ನೇತೃತ್ವದಲ್ಲಿ ನಡೆದ ಕಾರ್ಪೊರೇಟರ್ಸ್ ಸಭೆಯಲ್ಲಿ ಅನುಮೋದನೆಯನ್ನೂ ಕೂಡ ಪಡೆದಿದ್ದಾರೆ. 

ಈ ಸಂಬಂಧ ಬಿಬಿಎಂಪಿ ಮೇಯರ್ ಮಂಜುನಾಥ್ ರೆಡ್ಡಿ ಪ್ರತಿಕ್ರಿಯಿಸಿದ್ದು, ಬೆಂಗಳೂರು ನಗರದಲ್ಲಿ ಒಟ್ಟು 12 ವಿದ್ಯುತ್ ಚಿತಾಗಾರಗಳಿವೆ. ಇವುಗಳಿಗೆ ಪ್ರತಿಯೊಂದಕ್ಕೂ ಕೂಡ ದಿನಕ್ಕೆ 10 ಶವಗಳು ಬರುತ್ತಿವೆ. ಪರಿಣಾಮ ಅವುಗಳ ವಾರ್ಷಿಕ ವಿದ್ಯುತ್ ಬಿಲ್ 15 ಲಕ್ಷ ದಾಟುತ್ತಿದೆ. ಈ ಹಿಂದೆ ಒಂದು ಹೆಣದ ಶವ ಸಂಸ್ಕಾರಕ್ಕೆ 50 ರೂ. ವಿಧಿಸಲಾಗುತ್ತಿತ್ತು. ಆದರೆ ಆ ಶುಲ್ಕವನ್ನು ಸ್ವಲ್ಪಮಟ್ಟಿಗೆ ಹೆಚ್ಚಿಸಲು ನಿರ್ಧರಿಸಲಾಗಿದ್ದು, ಒಂದು ಶವ ಸಂಸ್ಕಾರಕ್ಕೆ 250ರಿಂದ 300 ರೂ. ಶುಲ್ಕ ವಿಧಿಸಲಿದ್ದೇವೆ. ಈ ಪದ್ಧತಿ ಶೀಘ್ರದಲ್ಲಿಯೇ ಜಾರಿಗೆ ಬರಲಿದೆ ಎಂದರು. 

ಇದೇ ವೇಳೆ, ಈ ಹಿಂದೆ ಒಂದು ಶವ ಸಂಸ್ಕಾರಕ್ಕೆ 1200 ರೂ. ಬಿಬಿಎಂಪಿ ಹೆಗಲಿಗೆ ಬೀಳುತ್ತಿತ್ತು. ಈ ಹಿನ್ನೆಲೆಯಲ್ಲಿ ಇದು ದುಬಾರಿಯಾಗಿದ್ದು, ಬಿಬಿಎಂಪಿಗೆ ಭರಿಸಲು ಸಾಧ್ಯವಾಗುತ್ತಿಲ್ಲ. ಕಾರಣ ಅರ್ಧ ಹಣವನ್ನು ಇಂಧನ ಇಲಾಖೆಯೇ ಭರಿಸುವಂತೆ ಪತ್ರ ಬರೆಯಲಾಗಿತ್ತು. ಅದಕ್ಕೆ ಇಲಾಖೆ ಕೂಡ ಒಪ್ಪಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಬಿಬಿಎಂಪಿಯು ಒಟ್ಟು ಹಣದ ಅರ್ಧ ಭಾಗದಷ್ಟು ಹಣವನ್ನು ಮಾತ್ರ ಭರಿಸಲಿದೆ ಎಂದು ಸ್ಪಷ್ಟಪಡಿಸಿದರು.