ಆರೋಪಿಗೆ ಹೆದರಿ ಅಪ್ಪನ ಮೇಲೆ ಅತ್ಯಾಚಾರದ ಆರೋಪ ಹೊರಿಸಿದ ಮಗಳು.

ಹಾಸನದ ಕೊಣನೂರಿನಲ್ಲಿ ಮಗಳ ಮೇಲೆ ಅತ್ಯಾಚಾರವೆಸಗಿದ ಆರೋಪದಲ್ಲಿ ಬಂಧಿತನಾಗಿದ್ದ ರಾಜಯ್ಯ ಎಂಬ ವ್ಯಕ್ತಿ ನಿರಪರಾಧಿ ಎಂದು ಸಾಬೀತಾಗಿದ್ದು, ಅವರು ಆರೋಪಮುಕ್ತರಾಗಿ ಜೈಲಿನಿಂದ ಬಿಡುಗಡೆಯಾಗಿದ್ದಾರೆ. ಆರೋಪಿ ಹರೀಶ್ ಸಾಯಿಸುವ ಬೆದರಿಕೆ ಹಾಕಿದ್ದರಿಂದ ಅಪ್ಪನ ಮೇಲೆ ಆರೋಪ ಹೊರಿಸಿದ್ದಾಗಿ ಬಾಲಕಿ ತಪ್ಪೊಪ್ಪಿಕೊಂಡಿದ್ದಾಳೆ. 

ಡಿಎನ್​ಎ ಪರೀಕ್ಷೆಯಲ್ಲಿ  ರಾಜಯ್ಯ ತಮ್ಮ ಮಗಳ ಮೇಲೆ ಅತ್ಯಾಚಾರವೆಸಗಿಲ್ಲದಿರುವುದು ಸಾಬೀತಾಗಿದೆ. 

ಕಳೆದ ಜೂನ್ ತಿಂಗಳಲ್ಲಿ  ಕೊಣನೂರು ಠಾಣಾ ವ್ಯಾಪ್ತಿಯಲ್ಲಿ ದಾಖಲಾದ ಈ ಪ್ರಕರಣದಲ್ಲಿ, "ತಂದೆ ನನ್ನ ಮೇಲೆ ನಿರಂತರ ಅತ್ಯಾಚಾರವೆಸಗಿದ್ದಾರೆ. ಆ ಕಾರಣದಿಂದ ನಾನು ಗರ್ಭಿಣಿಯಾಗಿದ್ದೇನೆ ಎಂದು ಮಗಳು ಪ್ರಕರಣ ದಾಖಲಿಸಿದ್ದಳು. ಈ ಹಿನ್ನೆಲೆಯಲ್ಲಿ ತಂದೆ ರಾಜಯ್ಯನನ್ನು ಬಂಧಿಸಲಾಗಿತ್ತು. ಒಮ್ಮೆ ತಂದೆ ಅತ್ಯಾಚಾರವೆಸಗಿದ್ದಾಗಿ ಹೇಳಿದ್ದ ಬಾಲಕಿ, ಇನ್ನೊಮ್ಮೆ ಹರೀಶ್ ಎಂಬಾತ ಈ ಕೃತ್ಯ ಎಸಗಿದ್ದಾನೆ" ಎಂದು ಹೇಳಿ ಗೊಂದಲ ಸೃಷ್ಟಿಸಿದ್ದಳು. 

ಆದರೆ ಡಿಎನ್​ಎ ಪರೀಕ್ಷೆಯಲ್ಲಿ ತಂದೆ ರಾಜಯ್ಯ ಅತ್ಯಾಚಾರವೆಸಗಿಲ್ಲ ಎಂಬುದು ಸಾಬೀತಾಗಿದೆ. 5 ತಿಂಗಳು ವಿಚಾರಣೆ ನಡೆಸಿದ ನ್ಯಾಯಾಲಯ ಆತನ ಬಿಡುಗಡೆಗೆ ಆದೇಶಿಸಿದೆ. ಈ ಹಿನ್ನೆಲೆಯಲ್ಲಿ ಜೈಲಿನಿಂದ ರಾಜಯ್ಯ ಬಿಡುಗಡೆಗೊಂಡಿದ್ದಾನೆ.

ಆರೋಪಿ ಹರೀಶ್ ಕೊಲೆ ಮಾಡುವ ಬೆದರಿಕೆ ಹಾಕಿದ್ದರಿಂದ ತಂದೆ ಮೇಲೆ ಆರೋಪ ಮಾಡಿದ್ದಾಗಿ ಬಾಲಕಿ ತಪ್ಪೊಪ್ಪಿಕೊಂಡಿದ್ದಾಳೆ. ಈಗ  ಆರೋಪಿ ಹರೀಶ್ ಪೊಲೀಸರ ವಶದಲ್ಲಿದ್ದಾನೆ.