ಅತ್ಯಾಚಾರ ಆರೋಪ ಮಾಡಿದ್ದ ಮೈತ್ರಿಯಾ ಗೌಡ ಆರೋಗ್ಯದಲ್ಲಿ ಚೇತರಿಕೆ

ಸಚಿವ ಡಿವಿಎಸ್ ಪುತ್ರ ಕಾರ್ತಿಕ್ ಗೌಡ ವಿರುದ್ಧ ವಂಚನೆ, ಅತ್ಯಾಚಾರದ ದೂರು ನೀಡಿದ್ದ  ಮೈತ್ರಿಯಾ ಗೌಡ  ತೀವ್ರ ಬಳಲಿಕೆಯಿಂದ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದು,ಈಗ ಆರೋಗ್ಯದಲ್ಲಿ ಚೇತರಿಕೆ ಉಂಟಾಗಿದೆ. ಡಿವಿಎಸ್ ಪುತ್ರ ಕಾರ್ತಿಕ್ ಗೌಡ ತಮ್ಮನ್ನು ಮದುವೆಯಾದ ಬಳಿಕ ಬೇರೆ ಯುವತಿಯೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡು ವಂಚನೆ ಮಾಡಿದ್ದಾರೆಂದು ಮೈತ್ರಿಯಾ ದೂರು ನೀಡಿದ್ದು, ವಂಚನೆ, ಅತ್ಯಾಚಾರ ಪ್ರಕರಣವನ್ನು ಪೊಲೀಸ್ ಠಾಣೆಯಲ್ಲಿ ದಾಖಲಿಸಿದ್ದರು.

ಈ ಕುರಿತು ಪೊಲೀಸರು ಮೈತ್ರಿಯಾ ಅವರನ್ನು ಸುಮಾರು 8 ಗಂಟೆಗಳ ಕಾಲ ತೀವ್ರ ವಿಚಾರಣೆಗೆ ಒಳಪಡಿಸಿದ್ದರು. ಸತತ ವಿಚಾರಣೆಯಿಂದ ಮತ್ತು ಮಾನಸಿಕ ವೇದನೆಯಿಂದ ಹಾಗೂ ಆಹಾರ ಸೇವಿಸದೇ ಬಳಲಿಕೆಯಿಂದ ತೀವ್ರ ಅಸ್ವಸ್ಥರಾಗಿದ್ದ ಮೈತ್ರಿಯಾ ಅವರನ್ನು ಚೈತನ್ಯ ಆಸ್ಪತ್ರೆಗೆ ದಾಖಲಿಸಲಾಗಿತ್ತು.

ಇಂದು ಮೈತ್ರಿಯಾ ಆರೋಗ್ಯ ಸುಧಾರಿಸಿದ್ದು, ಚೇತರಿಸಿಕೊಂಡಿದ್ದಾರೆ. ಮೈತ್ರಿಯಾ ಅವರ ವೈದ್ಯಕೀಯ ಪರೀಕ್ಷೆಯಲ್ಲಿ ಅತ್ಯಾಚಾರ ನಡೆದ ಬಗ್ಗೆ ಯಾವುದೇ ಕುರುಹುಗಳಿಲ್ಲ ಎಂದು ವೈದ್ಯರು ಸ್ಪಷ್ಟಪಡಿಸಿದ್ದರು. ಆದರೆ ಕಾರ್ತಿಕ್ ಗೌಡ ಮದುವೆಯ ಸೋಗಿನಲ್ಲಿ ಲೈಂಗಿಕ ಸಂಪರ್ಕ ಬೆಳೆಸಿದನೆಂದು ಮೈತ್ರಿಯಾ ಆರೋಪಿಸಿದ್ದು, ತೀವ್ರ ನೊಂದಿದ್ದ  ಅವರು ಅತ್ಯಾಚಾರ ಮತ್ತು ವಂಚನೆಯ ದೂರನ್ನು ದಾಖಲಿಸಿದ್ದರು.