6 ನೇ ತರಗತಿಯಲ್ಲಿ ಓದುತ್ತಿರುವ 12 ವರ್ಷದ ಬಾಲಕಿ ಮರಿಯಂ ಸಿದ್ಧಿಕಿ 3,000 ಸ್ಪರ್ಧಾರ್ಥಿಗಳನ್ನು ಮಣಿಸಿ ಗೀತಾ ಚಾಂಪಿಯನ್ ಲೀಗ್‌ನ ವಿಜಯಿಯಾಗಿ ಹೊರಹೊಮ್ಮಿದ್ದಾಳೆ. ಅಂತರಾಷ್ಟ್ರೀಯ ಸಂಘಟನೆಯಾದ ಕೃಷ್ಣ ಪ್ರಜ್ಞಾ( ಇಸ್ಕಾನ್) ಆಯೋಜಿಸಿದ್ದ ಹಿಂದೂಗಳ ಪವಿತ್ರ ಗೃಂಥವಾದ ಭಗವದ್ಗೀತೆ ಸಂಬಂಧಿಸಿದ ಈ ಲಿಖಿತ ಪರೀಕ್ಷೆಯಲ್ಲಿ ಮುಸ್ಲಿಮ್ ವಿದ್ಯಾರ್ಥಿನಿ ಗೆದ್ದಿರುವುದು ಬಹು ವಿಶೇಷವೆನಿಸಿದೆ.
ಕಾಸ್ಮೊಪೊಲಿಟನ್ ಹೈಸ್ಕೂಲ್ ವಿದ್ಯಾರ್ಥಿನಿಯಾಗಿರುವ ಮರಿಯಮ್ ಧರ್ಮಗಳ ಬಗ್ಗೆ ಜಿಜ್ಞಾಸೆಯನ್ನು ಹೊಂದಿದ್ದು, ಬಿಡುವಿನ ಸಮಯದಲ್ಲಿ ಧಾರ್ಮಿಕ ಗೃಂಥಗಳನ್ನು ಓದುವ ಹವ್ಯಾಸವನ್ನಿಟ್ಟುಕೊಂಡಿದ್ದಾಳೆ. ನನ್ನ ಶಿಕ್ಷಕಿ ಈ ಸ್ಪರ್ಧಯ ಬಗ್ಗೆ ತಿಳಿಸಿದಾಗ ಆ ಗೃಂಥದಲ್ಲಿರುವುದು ಏನೆಂದು ತಿಳಿದುಕೊಳ್ಳಲು ಇದು ಸದವಕಾಶ ಎಂದು ನಾನು ನಿಶ್ಚಯಿಸಿದೆ. ನನ್ನ ಪಾಲಕರು ಸಹ ನನಗೆ ಬೆಂಬಲ ನೀಡಿದರು ಎನ್ನುತ್ತಾಳೆ ಬಾಲಕಿ.
