ಪ್ರಿಯಾಂಕಾ ನನ್ನ ಮಗಳಿದ್ದಂತೆ ಎಂದು ಮೋದಿ ಹೇಳಿದ್ದ ಮಾತಿಗೆ ಕತ್ತರಿ ಹಾಕಿದ್ದ ಸುದ್ದಿವಾಹಿನಿಯೊಂದು ಈಗ ಅವರ ಮತ್ತೊಂದು ಹೇಳಿಕೆಯನ್ನೂ ಸಹ ಕಟ್ ಮಾಡಿ ತೋರಿಸಿದೆ. ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ ರಾಜಕೀಯ ಕಾರ್ಯದರ್ಶಿ ಅಹಮದ್ ಪಟೇಲ್ ನನ್ನ ಒಳ್ಳೆಯ ಸ್ನೇಹಿತರಾಗಿದ್ದರು, ಈಗ ಅವರು ನನ್ನ ಪೋನ್ ಕರೆಯನ್ನು ತೆಗೆದುಕೊಳ್ಳುತ್ತಿಲ್ಲ ಎಂದು ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿ ಸಂದರ್ಶನದಲ್ಲಿ ಹೇಳಿದ್ದ ಭಾಗಕ್ಕೆ ದೂರದರ್ಶನ ಕತ್ತರಿ ಹಾಕಿದೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ಅಹಮದ್ ನಾನು 1980ರಲ್ಲಿ ಒಮ್ಮೆ ಅವರ ಜತೆ ಊಟ ಮಾಡಿದ್ದು ಹೌದು. ಆದರೆ ಮೋದಿಯವರು 2001ರಲ್ಲಿ ಮುಖ್ಯಮಂತ್ರಿಯಾದಾಗಿನಿಂದ ನಾನವರ ಜತೆ ಒಂದು ಕಪ್ ಟೀಯನ್ನು ಸಹ ಕುಡಿದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಬಿಜೆಪಿ ನಾಯಕನ ವೆಬ್ಸೈಟ್ನಲ್ಲಿ ಸುದ್ದಿವಾಹಿನಿ ಮಾಡಿದ ಸಂದರ್ಶನದ ಪೂರ್ಣ ಭಾಗವನ್ನು ಪ್ರಕಟಿಸಲಾಗಿದೆ. ಆದರೆ ಸಂದರ್ಶನ ಮಾಡಿದ್ದ ಸುದ್ದಿವಾಹಿನಿ ಈ ಭಾಗಕ್ಕೆ ಕತ್ತರಿ ಹಾಕಿದೆ.