ಬದೌನ್ ಅತ್ಯಾಚಾರದ ಕರಿ ನೆರಳಿನಿಂದ ಎದ್ದೇಳುವ ಲಕ್ಷಣ ಕಾಣುತ್ತಿಲ್ಲ. ಕಳೆದ ಕೆಲ ತಿಂಗಳುಗಳ ಹಿಂದೆ ಇಬ್ಬರು ಸಹೋದರಿಯರು ಮರದಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಕಂಡು ಬಂದ ಬಳಿಕ ಬದೌನ್ ಅತ್ಯಾಚಾರದ ಕಾರಣಕ್ಕೆ ಇಡೀ ದೇಶದ ಗಮನವನ್ನು ಸೆಳೆಯುತ್ತಿದೆ. ಪದೇ ಪದೇ ಅಲ್ಲಿ ಅತ್ಯಾಚಾರದ ಪ್ರಕರಣಗಳು ಬೆಳಕಿಗೆ ಬರುತ್ತಿದ್ದು ಈಗ ಮತ್ತೊಂದು ಕರಾಳ ಘಟನೆ ಬಹಳ ತಡವಾಗಿ ಬೆಳಕಿಗೆ ಬಂದಿದೆ. ಈ ಪ್ರಕರಣದ ಪೀಡಿತೆ ಮತ್ತು ಆರೋಪಿಗಳು ಅಪ್ರಾಪ್ತರಾಗಿದ್ದಾರೆ ಎಂಬುದು ಮತ್ತೂ ಶೋಚನೀಯ ವಿಷಯ.
ಅಪ್ರಾಪ್ತ ಬಾಲಕಿಯನ್ನು ಅಪಹರಿಸಿದ ಮೂವರು ಬಾಲಕರು ಆಕೆಯ ಮೇಲೆ ಅಮಾನುಷವಾಗಿ ಅತ್ಯಾಚಾರ ನಡೆಸಿದ್ದಲ್ಲದೇ ಗುಪ್ತಾಂಗದಲ್ಲಿ ಮ್ಯಾಚ್‌‌ಸ್ಟಿಕ್‌,ಬಟ್ಟೆ, ಪ್ಲಾಸ್ಟಿಕ್ ಮತ್ತು ಮರದ ತುಂಡನ್ನು ಸೇರಿಸಿ ಪೈಶಾಚಿಕವಾಗಿ ನಡೆದುಕೊಳ್ಳುವುದರ ಮೂಲಕ ಸ್ಥಳೀಯರನ್ನು ಬೆಚ್ಚಿ ಬೀಳಿಸಿದ್ದಾರೆ.
ಜೂನ್ 23ರಂದು ಈ ಘಟನೆ ನಡೆದಿದ್ದು, ಬಹಳ ತಡವಾಗಿ ಬೆಳಕಿಗೆ ಬಂದಿದೆ. ಅಂದು ಬೆಳಿಗ್ಗೆ ಬಿಸ್ಕಿಟ್ ಮತ್ತು ಸಿಹಿ ತಿಂಡಿಯನ್ನು ತರಲು ಅಂಗಡಿಗೆ ಹೋಗಿದ್ದ 8ನೇ ತರಗತಿ ಓದುತ್ತಿದ್ದ ಬಾಲಕಿಯನ್ನು ಕರೆದ ನೆರೆಮನೆ ಬಾಲಕ ನಿನ್ನನ್ನು ಯಾರೋ ಅಪರಿಚಿತರು ಕಾಯುತ್ತಿದ್ದಾರೆ ಎಂದು ಹೇಳಿದ್ದಾನೆ. ಹೀಗಾಗಿ ಆಕೆಯ ಜತೆಗೆ ಹೋದ ಬಾಲಕಿಯ ಬಾಯಿ ಮತ್ತು ಕೈ ಕಟ್ಟಿ ಅಪಹರಿಸಿದ ಮೂವರು ಬಾಲಕರು ನಿರ್ಜನ ಪ್ರದೇಶಕ್ಕೆ ಕೊಂಡೊಯ್ದು ಬಲವಂತವಾಗಿ ಮಾದಕ ಪಾನೀಯವನ್ನು ಕುಡಿಸಿ ಸಾಮೂಹಿಕ ಅತ್ಯಾಚಾರವೆಸಗಿದ್ದಾರೆ.
ಅತ್ಯಾಚಾರ ಎಸಗಿದ್ದಲ್ಲದೇ ಮನಬಂದಂತೆ ಆಕೆಯನ್ನು ಥಳಿಸಿದ ಯುವಕರು, ಗುಪ್ತಾಂಗದಲ್ಲಿ ಮ್ಯಾಚ್‌‌ಸ್ಟಿಕ್‌,ಬಟ್ಟೆ, ಪ್ಲಾಸ್ಟಿಕ್ ಮತ್ತು ಮರದ ತುಂಡನ್ನು ತೂರಿಸಿ ರಾಕ್ಷಸಿತನವನ್ನು ಪ್ರದರ್ಶಿಸಿದ್ದಾರೆ. ಘಟನೆಯ ಕುರಿತು ಯಾರಿಗಾದರೂ ಮಾಹಿತಿ ನೀಡಿದರೆ ನಿನ್ನನ್ನು ಕೊಲ್ಲುವುದಾಗಿ ಬೆದರಿಸಿದ್ದಾರೆ. ನಂತರ ಆಕೆಯ ಮನೆಯ ಮುಂದೆ ಎಸೆದು ಹೋಗಿದ್ದಾರೆ.
