ಸಾಕ್ಷ್ಯಚಿತ್ರದ ನಿರ್ಮಾಪಕ, ನಿರ್ದೇಶಕರಿಗೆ ಜೈಲಿನ ಅಧಿಕಾರಿಗಳ ಲೀಗಲ್ ನೋಟಿಸ್

ತಿಹಾರ್ ಜೈಲಿನ ಅಧಿಕಾರಿಗಳು ಗುರುವಾರ ವಿವಾದಾತ್ಮಕ ಸಾಕ್ಷ್ಯಚಿತ್ರ ಇಂಡಿಯಾಸ್ ಡಾಟರ್ ನಿರ್ದೇಶಕ ಮತ್ತು ನಿರ್ಮಾಪಕರಿಗೆ ಲೀಗಲ್ ನೋಟೀಸ್ ಜಾರಿ ಮಾಡಿದ್ದಾರೆ. ಜೈಲಿನ ಅಧಿಕಾರಿಗಳು ವಿಧಿಸಿದ್ದ ಷರತ್ತುಗಳನ್ನು ಅವರು ಉಲ್ಲಂಘಿಸಿದ್ದು, ತಿಹಾರ್ ಜೈಲಿನ ಒಳಗೆ ಚಿತ್ರೀಕರಣಕ್ಕೆ ಅನುಮತಿ ಪಡೆಯುವಾಗ ದಾರಿ ತಪ್ಪಿಸಿದರು ಎಂದು ಆರೋಪಿಸಲಾಗಿದೆ.

ತಮಗೆ ಸಾಕ್ಷ್ಯಚಿತ್ರದ ಕಿರುರೂಪವನ್ನು ಮಾತ್ರ ತೋರಿಸಲಾಗಿದೆ. ಆ ರೂಪವನ್ನು ವೀಕ್ಷಿಸಿದ ನಂತರ ನಾವು ಕೆಲವು ಆಕ್ಷೇಪಗಳನ್ನು ಸಲ್ಲಿಸಿದ್ದೆವು.  ಗ್ಯಾಂಗ್ ರೇಪ್ ಕೈದಿ ಮುಕೇಶ್ ಸಿಂಗ್ ರೇಪ್ ಸಮರ್ಥಿಸಿಕೊಂಡು ಮಾತನಾಡಿದ್ದ ಸಂದರ್ಶನ ತೆಗೆದುಹಾಕುವಂತೆ ನಾವು ಸೂಚಿಸಿದ್ದೆವು.

ಆದರೆ ಚಿತ್ರದ ಸಿಬ್ಬಂದಿ ಇದನ್ನು ಪಾಲಿಸಿಲ್ಲ. ಈ ಹಿನ್ನೆಲೆಯಲ್ಲಿ ನಾವು ದೆಹಲಿಯ ಬಿಬಿಸಿಯ ಎರಡು ಕಚೇರಿಗಳಿಗೆ ಮತ್ತು ಸಾಕ್ಷ್ಯಚಿತ್ರದ ನಿರ್ಮಾಪಕ, ಸಹ ನಿರ್ಮಾಪಕ ಮತ್ತು ನಿರ್ದೇಶಕರಿಗೆ ಲೀಗಲ್ ನೋಟಿಸ್ ಕಳಿಸಿದ್ದೇವೆ ಎಂದು ತಿಹಾರ್ ಜೈಲಿನ ಪಿಆರ್‌ಒ ಮುಖೇಶ್ ಪ್ರಸಾದ್ ತಿಳಿಸಿದ್ದಾರೆ.