ದೇಶದ ಪ್ರತಿಯೊಬ್ಬ ನಾಗರಿಕನನ್ನು ಸ್ಮಾರ್ಟ್‌ಫೋನ್ ಮೂಲಕ ಸಂಪರ್ಕಿಸುವ ಪ್ರಧಾನಿ ಮೋದಿ ಮಹಾತ್ವಾಕಾಂಕ್ಷೆಯ ಯೋಜನೆಯಾದ ಡಿಜಿಟಲ್ ಇಂಡಿಯಾ ಪ್ರಾರಂಭದ ಹಂತದಲ್ಲಿರುವಾಗ, ಅದಕ್ಕೆ ವ್ಯಂಗ್ಯವಾಗಿ ಗೊಂಡಾ ಬ್ಲಾಕ್ ಅಡಿ ಬರುವ ಬಸೌಲಿ ಗ್ರಾಮಪಂಚಾಯತ್ ತನ್ನ ಈ ನಿರ್ಧಾರವನ್ನು ಘೋಷಿಸಿದೆ.
ಗ್ರಾಮದಲ್ಲಿರುವ ಅವಿವಾಹಿತ ಯುವತಿಯರು ಮೊಬೈಲ್ ಫೋನ್, ಸಾಮಾಜಿಕ ಮಾಧ್ಯಮಗಳನ್ನು ಬಳಸಬಾರದೆಂದು ಆಗ್ರಾದಿಂದ 80 ಕೀಲೋಮೀಟರ್ ದೂರದಲ್ಲಿರುವ ಬಸೌಲಿ ಗ್ರಾಮದ ಖಾಪ್ ಪಂಚಾಯತ್ ಹೇಳಿದೆ. ಒಂದು ವೇಳೆ ಸಿಕ್ಕಿ ಬಿದ್ದರೆ ಅವರ ಪೋಷಕರು ಗ್ರಾಮದಲ್ಲಿ 500 ಮೀಟರ್ ರಸ್ತೆಯನ್ನು 5 ದಿನಗಳ ಕಾಲ ಗುಡಿಸಬೇಕು ಅಥವಾ 1,000 ರೂಪಾಯಿಗಳವರೆಗೆ ದಂಡವನ್ನು ನೀಡಬೇಕು ಎಂದು ಪಂಚಾಯತ್ ತಾಕೀತು ಮಾಡಿದೆ.
ಹದಿಹರೆಯದಲ್ಲಿ ಮೊಬೈಲ್ ಬಳಸುವ ಹುಡುಗಿಯರು ಕೆಟ್ಟು ಹೋಗುತ್ತಾರೆ ಮತ್ತು ಹುಡುಗರ ಜತೆ ಸಂಬಂಧವನ್ನು ಬೆಳೆಸುತ್ತಾರೆ. ಇದು ಅವರ ವಿರುದ್ಧ ಅಪರಾಧಕ್ಕೂ ಕಾರಣವಾಗುತ್ತದೆ. ನಮ್ಮ ಕಾಲದಲ್ಲಿ ಈ ರೀತಿಯ ಸಮಸ್ಯೆಗಳಿರಲಿಲ್ಲ. ತಂತ್ರಜ್ಞಾನ ಅವರನ್ನು ಕೆಡಿಸಿ ಬಿಟ್ಟಿದೆ, ನಾವದನ್ನು ನಿಗ್ರಹಿಸುವ ಅನಿವಾರ್ಯತೆ ಇದೆ, ಎಂದು ಪಂಚಾಯತ್ ಸಂಚಾಲಕ ರಾಮವೀರ್ ಸಿಂಗ್ ಹೇಳಿದ್ದಾರೆ.
