ಪಿಸ್ತೂಲು ಹಿಡಿದು ಮತಗಟ್ಟೆಗೆ; ಬಿಜೆಪಿ ಶಾಸಕನ ಸಹೋದರನ ಬಂಧನ

ಇಂದು ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯ ಮೊದಲ ಹಂತದ ಮತದಾನ ನಡೆಯುತ್ತಿದ್ದು, ಬಿಜೆಪಿ ಶಾಸಕನ ಸಹೋದರನೊಬ್ಬ ಕೈಯ್ಯಲ್ಲಿ ಪಿಸ್ತೂಲು ಹಿಡಿದು ಮತಗಟ್ಟೆ ಪ್ರವೇಶಿಸಿದ ಘಟನೆ  ಫರೀದಾಪುರ ಮತಗಟ್ಟೆಯಲ್ಲಿ ನಡೆದಿದೆ. 

ಬಂಧಿತನನ್ನು ಸರ್ದಾನಾ (ಮೀರತ್) ಶಾಸಕ ಸಂಗೀತ್ ಸೋಮ್ ಸಹೋದರ ಗಗನ್ ಸೋಮ್ ಎಂದು ಗುರುತಿಸಲಾಗಿದ್ದು, ಆತನನ್ನು ವಶಕ್ಕೆ ಪಡೆದಿರುವ ಪೊಲೀಸರು ತನಿಖೆಯನ್ನು ಕೈಗೊಂಡಿದ್ದಾರೆ. 

ಮತ ಚಲಾಯಿಸಲು ಬಂದಿದ್ದ ಗಗನ್‌ನನ್ನು ಭದ್ರತಾ ಸಿಬ್ಬಂದಿ ತಪಾಸಣೆಗೊಳಪಡಿಸಿದಾಗ ಆತನ ಬಳಿ ಪಿಸ್ತೂಲ್ ಇರುವುದು ಪತ್ತೆಯಾಗಿದೆ. 

ಮತಗಟ್ಟೆಗೆ ಶಸ್ತ್ರಾಸ್ತಗಳನ್ನು ತರುವುದರ ಮೂಲಕ ಚುನಾವಣಾ ನಿಯಮಗಳನ್ನು ಉಲ್ಲಂಘಿಸಿರುವ ಆರೋಪಿಯನ್ನು ವಿಚಾರಣೆಗೊಳಪಡಿಸಲಾಗಿದ್ದು, ತನಿಖೆ ಪೂರ್ಣಗೊಂಡ ಬಳಿಕ ಮುಂದಿನ ಕ್ರಮವನ್ನು ಕೈಗೊಳ್ಳಲಾಗುವುದು ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

2013ರಲ್ಲಿ ನಡೆದ ಕೋಮುಗಲಭೆ ಸಂದರ್ಭದಲ್ಲಿ ಪ್ರಚೋದನಾಕಾರಿ ಭಾಷಣ ಮಾಡಿದ ಆರೋಪ ಸಂಗೀತ್ ಸೋಮ್ ಮೇಲಿದೆ.