ಬಾಹುಬಲಿ ಹರೀಶ್ ರಾವತ್ ನೋಡಿ ತಬ್ಬಿಬ್ಬಾದ ಮೋದಿ, ಶಾ (ವಿಡಿಯೋ)

ಪಂಚರಾಜ್ಯಗಳ ಚುನಾವಣೆ ದಿನದಿನಕ್ಕೂ ರಂಗೇರುತ್ತಿದ್ದು ಉತ್ತರಾಖಂಡದ ಮುಖ್ಯಮಂತ್ರಿ ಹರೀಶ್ ರಾವತ್ ಬಾಹುಬಲಿ ಅವತಾರ ತಾಳಿದ್ದಾರೆ. ಸಂಪೂರ್ಣ ರಾಜ್ಯವನ್ನು ಹೆಗಲ ಮೇಲೆ ಹೊತ್ತ ರಾವತ್ ಅವರನ್ನು ನೋಡಿ ಪ್ರಧಾನಿ ನರೇಂದ್ರ ಮೋದಿ, ಬಿಜೆಪಿ ಅಧ್ಯಕ್ಷ ಅಮಿತ್ ಶಾ ದಿಗ್ಭ್ರಮೆಯಿಂದ ನೋಡುತ್ತಿದ್ದಾರೆ - ಈ ದೃಶ್ಯಾವಳಿಗಳನ್ನೊಳಗೊಂಡ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಹರಿದಾಡುತ್ತಿದೆ.

ಕಾಂಗ್ರೆಸ್ ಕಾರ್ಯಕರ್ತರು ಹರಿಯಬಿಟ್ಟಿರುವ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದ್ದು. ಸಿನಿಮಾದಲ್ಲಿ ಬಾಹುಬಲಿ ಶಿವಲಿಂಗವನ್ನು ಎತ್ತುತ್ತಿದ್ದರೆ ಅದನ್ನು ಎಡಿಟ್ ಮಾಡಿ ರಾವತ್ ಅವರ ಮುಖವನ್ನು ಬಾಹುಬಲಿ ಮುಖಕ್ಕೆ ಅಂಟಿಸಲಾಗಿದೆ. ಶಿವಲಿಂಗದ ರೂಪದಲ್ಲಿರುವ ಉತ್ತರಾಖಂಡವನ್ನು ರಾವತ್ ಎತ್ತುತ್ತಿದ್ದು ಅವರನ್ನು ರಾಜ್ಯ ರಕ್ಷಕನಂತೆ ಬಿಂಬಿಸಲಾಗಿದೆ.

ಈ ವಿಡಿಯೋವನ್ನು ಎರಡು ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಿಸಿದ್ದಾರೆ. 5,000ಕ್ಕಿಂತ ಹೆಚ್ಚು ಸಲ ಇದನ್ನು ಹಂಚಿಕೊಳ್ಳಲಾಗಿದೆ.

ವಿಡಿಯೋದ ಕೊನೆಯಲ್ಲಿ ಸಂದೇಶವೂ ಇದೆ. ದಿಲ್ ಕಿ ಬಾತ್ ಸುನೆ..ಹರೀಶ್ ರಾವತ್‌ಕೋ ಚುನೆ (ಮನಸ್ಸಿನ ಮಾತು ಕೇಳಿ, ಹರೀಶ್ ರಾವತ್‍ರನ್ನು ಆಯ್ಕೆ ಮಾಡಿ). ಈ ವಿಡಿಯೋಗೂ ತಮಗೂ ಯಾವುದೇ ಸಂಬಂಧ ಇಲ್ಲ ಎಂದು ರಾವತ್ ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ.

ಉತ್ತರಾಖಂಡ ವಿಧಾನಸಭೆಗೆ ಇದೇ 15ರಂದು ಮತದಾನ ನಡೆಯಲಿದೆ.

ಬಾಹುಬಲಿಯಾದ ಹರೀಶ್ ರಾವತ್; ತಬ್ಬಿಬ್ಬಾದ ಮೋದಿ, ಶಾ (ವಿಡಿಯೋ)