ಗೋವಾದಲ್ಲಿ ಜನರು ತಮಗೆ ಬೇಕಾದಂತಹ ಉಡುಗೆಗಳನ್ನು ಧರಿಸಬಹುದು, ಯಾರಿಗಾದರೂ ಜನರು ಧರಿಸಿರುವ ಉಡುಗೆ ಆಕ್ಷೇಪಣಾರ್ಹವಾಗಿ ಕಂಡು ಬಂದರೆ ಅಂತಹವರಿಗೆ ಪ್ರಕರಣ ದಾಖಲಿಸಲು ಅವಕಾಶವಿದೆ ಎಂದು ಗೋವಾ ಮುಖ್ಯಮಂತ್ರಿ ಮನೋಹರ ಪರಿಕ್ಕರ್ ಅವರು ಬುಧವಾರ ವಿಧಾನಸಭೆಯಲ್ಲಿ ತಿಳಿಸಿದರು.
ಮಹಿಳೆಯು ಧರಿಸಿದ ಉಡುಗೆಯ ಬಗ್ಗೆ ಯಾರಾದರೂ ಕಾನೂನನ್ನು ಕೈಗೆತ್ತಿಕೊಳ್ಳುವುದು ಮತ್ತು ಮಹಿಳೆಗೆ ಕಿರುಕುಳ ನೀಡುವುದನ್ನು ನಾನು ಸಹಿಸುವುದಿಲ್ಲ. ಒಂದು ವೇಳೆ ಯಾರಿಗಾದರೂ ಉಡುಗೆ ಅಸಭ್ಯ ವರ್ತನೆಗೆ ಕಾರಣವಾಗಬಹುದು ಎನ್ನುವಂತಿದ್ದರೆ ಪ್ರಕರಣ ದಾಖಲಿಸಬಹುದು. ಇದಕ್ಕೆ ಕಾನೂನಿನಲ್ಲಿ ಅವಕಾಶವಿದೆ. ಆದರೆ ರಾಜ್ಯದಲ್ಲಿ ನೈತಿಕ ಪೊಲೀಸ್ಗಿರಿಯನ್ನು ಮಾಡಲು ಯಾರಿಗೂ ಅವಕಾಶ ನೀಡುವುದಿಲ್ಲ’ ಎಂದು ಪರಿಕ್ಕರ್ ಹೇಳಿದರು.