ಅದೇನು ಲುಕ್ಕು, ಅದೇನು ಸ್ಟೆಪ್ಪು, ಈ ವಯಸ್ಸಿನಲ್ಲೂ ಇಂತಹ ಚಾರ್ಮ್ ಉಳಿಸಿಕೊಂಡಿದ್ದಾರೆಂದರೆ ನಿಜಕ್ಕೂ ಗ್ರೇಟ್. ಅವರು ನನ್ನ ಪ್ರಕಾರ ಕನ್ನಡದ ಅಮೀರ್ ಖಾನ್. ಹೀಗೆಂದು ಹೊಗಳಿ ಅಟ್ಟಕ್ಕೇರಿಸಿರುವುದು ಲಕ್ಕಿ ಸ್ಟಾರ್ ರಮ್ಯಾ.
ಶಿವಣ್ಣನ ಹೊಸ ಚಿತ್ರ 'ಮೈಲಾರಿ'ಯ ಪೋಸ್ಟರುಗಳನ್ನು ನೋಡಿರುವ ರಮ್ಯಾ ಪುಳಕಿತರಾಗಿದ್ದಾರೆ. ಅವರ ಸ್ಟೈಲಿಶ್ ಲುಕ್ ನಿದ್ದೆಗೆಡಿಸಿದೆ. ಸಖತ್ ಆನಂದವಾಗಿದೆ. ಈ ವಯಸ್ಸಲ್ಲೂ ಶಿವಣ್ಣ ಎಷ್ಟು ಯಂಗ್ ಮತ್ತು ಸ್ಟೈಲಿಶ್ ಆಗಿ ಕಾಣಿಸ್ತಿದ್ದಾರೆ ಎಂದು ಹುಬ್ಬೇರಿಸಿದ್ದಾರೆ.
ಹಾಗಾದ್ರೆ ಅವರ ಜತೆ ನೀವು ನಟಿಸೋದ್ಯಾವಾಗ? ಇಂತಹ ಪ್ರಶ್ನೆಗೆ ಒಂದು ಕ್ಷಣ ಮೌನವಾಗುವ ರಮ್ಯಾ, ಕಥೆಯತ್ತ ಬೆಟ್ಟು ಮಾಡಿ ಸುಮ್ಮನಾಗುತ್ತಾರೆ.
ನಾವು ಇದುವರೆಗೆ ತೆರೆಯ ಮೇಲೆ ಜಂಟಿಯಾಗಿ ಕಾಣಿಸಿಕೊಳ್ಳದೇ ಇರಲು ಪ್ರಮುಖ ಕಾರಣ ಸರಿಯಾದ ಕಥೆ ಸಿಗದೇ ಇರುವುದು. ನಮ್ಮಿಬ್ಬರ ಜೋಡಿ ಅಂದ ಮೇಲೆ ನಿರೀಕ್ಷೆಗಳು ಹೆಚ್ಚು. ಅದನ್ನು ಪೂರೈಸುವಂತಹ ಕಥೆಯ ಅಗತ್ಯ ನಮಗಿರುತ್ತದೆ. ಜನರ ನಿರೀಕ್ಷೆಗಳನ್ನು ಹುಸಿ ಮಾಡುವುದಿಲ್ಲ. ಮುಂದಿನ ವರ್ಷ ಖಂಡಿತಾ ನಾವು ಜತೆಯಾಗಿ ನಟಿಸುತ್ತೇವೆ ಎಂದು ರೈಲು ಹತ್ತಿಸಿದ್ದಾರೆ.
ಗೋಲ್ಡನ್ ಸ್ಟಾರ್ ಜತೆಗಿನ ಬಹುನಿರೀಕ್ಷೆಯ ಚಿತ್ರ 'ಬೊಂಬಾಟ್' ಸದ್ದಿಲ್ಲದೆ ಠುಸ್ಸಾಗಿದ್ದು ಕೂಡ ಅವರಿಗೆ ನೆನಪಿದೆ. ಶಿವಣ್ಣ ಜತೆಗಿನ ನನ್ನ ಚಿತ್ರ ಹಾಗಾಗಬಾರದು ಎನ್ನುವುದಕ್ಕೆ ಕಥೆಯ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳುತ್ತಿದ್ದೇನೆ ಎಂದು ರಮ್ಯಾ ಹೇಳಿದ್ದಾರೆ.
ಈ ನಡುವೆ ಮೈಲಾರಿ ಚಿತ್ರದ ಹಾಡುಗಳು ಕೂಡ ರಮ್ಯಾಗೆ ಸಖತ್ ಇಷ್ಟವಾಗಿದೆ. ಅದರಲ್ಲೂ ಪುನೀತ್ ರಾಜ್‌ಕುಮಾರ್ ಹಾಡಿರುವ ಹಾಡಂತೂ ತುಂಬಾ ಇಷ್ಟ ಎಂದಿದ್ದಾರೆ.
