ತಮ್ಮ ಸಹನಟರಿಗೆ ಪ್ರೋತ್ಸಾಹ, ಆದರ ತೋರುವುದರಲ್ಲಿ ಸಲ್ಲು ಮಿಯಾ ಸದಾ ಮುಂದು. ಅಂತಹದ್ದರಲ್ಲಿ ಇತ್ತೀಚಿಗೆ ಬಿಡುಗಡೆಯಾದ ಬಜರಂಗಿ ಭಾಯಿಜಾನ್ ಚಿತ್ರದಲ್ಲಿ ಅವರ ಜತೆ ನಟಿಸಿದ್ದ ಮುದ್ದು ಬಾಲೆ ಹರ್ಷಾಲಿ ಬಗ್ಗೆ ಅವರು ಅತಿಯಾದ ಪ್ರೀತಿ ತೋರುತ್ತಿರುವುದರಲ್ಲಿ ಏನೂ ವಿಶೇಷವಿಲ್ಲ ಬಿಡಿ.
ಚಿನಕುರಳಿ ಮುನ್ನಿಗೆ ಸಲ್ಲು ಮಾರು ಹೋಗಿದ್ದಾರಂತೆ. ಆಕೆಯ ಚಟ್ ಪಟಾಕಿಯಂತ ಮಾತು, ಮುದ್ದು ಮುಖ, ಅಸಾಮಾನ್ಯ ಪ್ರತಿಭೆ ಸಲ್ಮಾನ್ ಅವರನ್ನು ಪ್ರಭಾವಗೊಳಿಸಿದೆಯಂತೆ. ಚಿತ್ರ ಗೆಲ್ಲಲು ಆಕೆ ಬಹುಮುಖ್ಯ ಕಾರಣಳು ಎಂಬುದು ಸಲ್ಲು ಅಭಿಪ್ರಾಯ. ಆಕೆಗೇನಾದರೂ ಉಡುಗೊರೆ ಕೊಡಲು ಬಯಸಿದ್ದ ಸಲ್ಲು , ಆಕೆಯ ಸಂಪೂರ್ಣ ವಿದ್ಯಾಭ್ಯಾಸದ ವೆಚ್ಚವನ್ನು ವಹಿಸಿಕೊಂಡಿದ್ದಾರಂತೆ. ಅದಕ್ಕಾಗಿ ಒಂದುವರೆ ಕೋಟಿ ರೂಪಾಯಿಯನ್ನು ಆಕೆಯ ಪೋಷಕರ ಬಳಿ ನೀಡಿದ್ದಾರೆಂಬ ಸುದ್ದಿ ಹರಿದಾಡುತ್ತಿದೆ.
ಚಿತ್ರಕ್ಕೆ ಆಯ್ಕೆಯಾಗುತ್ತಿದ್ದಂತೆ ನಟ ಸಲ್ಮಾನ್‌ರಲ್ಲಿ ಹರ್ಷಾಲಿ ಈ ಚಿತ್ರದ ಮೂಲಕ ನಿಮ್ಮಂತೆ ನಾನೂ ಸೂಪರ್‌ಸ್ಟಾರ್ ಆಗಬೇಕು ಎಂದು ಬೇಡಿಕೆ ಇಟ್ಟಿದ್ದಳಂತೆ. ಆದರೆ ಆಕೆಯ ಅದ್ಭುತ ಅಭಿನಯ ಸಲ್ಲುಗೆ ಸೆಡ್ಡು ಹೊಡೆಯುವಂತಿದ್ದು, ಆಕೆ ಈಗ ಸ್ವತಃ ಸೂಪರ್ ಸ್ಟಾರ್ ಎನ್ನಿಸಿಕೊಂಡಿದ್ದಾಳೆ.
