ಬೆಂಗಳೂರು: ಏನ್ರೀ ಇದು.. ಈ ವಯಸ್ಸಲ್ಲಿ ಜಗ್ಗೇಶ್ ಇನ್ನೊಂದು ಲವ್ ಮಾಡ್ತಾವ್ರಾ ಎಂದು ಕೇಳಬೇಡಿ. ಅಸಲಿಗೆ ಜಗ್ಗೇಶ್ ಹಿಂದೊಮ್ಮೆ ಲವ್ ಮಾಡಿ ಸುಪ್ರೀಂ ಕೋರ್ಟ್ ವರೆಗೂ ಹೋಗಿ ತಮ್ಮ ಪ್ರೀತಿಯ ಪತ್ನಿ ಪರಿಮಳಾ ಅವರನ್ನು ಗೆದ್ದು ಬಂದಿದ್ದು ಇತಿಹಾಸ.
ಇದೀಗ ಅದೇ ಕತೆಯನ್ನು ತೆರೆಯ ಮೇಲೆ ತರಲು ಜಗ್ಗೇಶ್ ಪುತ್ರ ಯತಿರಾಜ್ ತಯಾರಿ ನಡೆಸಿದ್ದಾರೆ. ಅಂದರೆ ಜಗ್ಗೇಶ್ ದ್ವಿತೀಯ ಪುತ್ರ ಯತಿರಾಜ್ ಇದೀಗ ಅಪ್ಪ-ಅಮ್ಮನ ಲವ್ ಸ್ಟೋರಿಯನ್ನೇ ಸಿನಿಮಾ ಮಾಡಲು ಹೊರಟಿದ್ದಾರೆ.
ಜಗ್ಗೇಶ್ ಲವ್ ಸ್ಟೋರಿ ಯಾವ ಸಿನಿಮಾ ಕತೆಗೂ ಕಡಿಮೆಯಿಲ್ಲ. ಹುಡುಗಿಯ ಮನೆಯವರ ವಿರೋಧ ಕಟ್ಟಿಕೊಂಡು ಜಗ್ಗೇಶ್ ಸುಪ್ರೀಂ ಕೋರ್ಟ್ ನಲ್ಲಿ ಪ್ರಕರಣ ಗೆದ್ದು ಪತ್ನಿಯನ್ನು ಮನೆ ತುಂಬಿಸಿಕೊಂಡ ಕತೆ ಈಗಾಗಲೇ ಹಲವು ಬಾರಿ ಓದಿರುತ್ತೀರಿ. ಇತ್ತೀಚೆಗೆ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲೂ ಜಗ್ಗೇಶ್ ಈ ಬಗ್ಗೆ ಹೇಳಿದ್ದರು. ಇದೀಗ ಅದೇ ಕತೆ ತೆರೆ ಮೇಲೆ ಬರಲಿದೆ. ಆ ಮೂಲಕ ಜಗ್ಗೇಶ್ ದ್ವಿತೀಯ ಪುತ್ರನೂ ಚಿತ್ರರಂಗಕ್ಕೆ ಪರಿಚಯವಾಗಲಿದ್ದಾರೆ.
