ಮಿಸ್ಟರ್ ಅಂಡ್ ಮಿಸೆಸ್ ರಾಮಾಚಾರಿಯ ಮೂಲಕ ಗೆಲುವಿನ ಪತಾಕೆ ಹಾರಿಸಿರುವ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಅವರು ಈಗ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರ ಸಿನಿಮಾ ನಿರ್ದೇಶನ ಮಾಡುವತ್ತ ಚಿತ್ತ ನೆಟ್ಟಿದ್ದಾರೆ. ಅವರ ಮುಂದಿನ ಚಿತ್ರದಲ್ಲಿ ಪುನೀತ್ ಅಭಿನಯಿಸುತ್ತಿದ್ದಾರೆ. ಇತ್ತೀಚಿಗೆ ನಡೆದ ಮೈತ್ರಿ ಪ್ರೆಸ್ ಮೀಟ್ ನಲ್ಲಿ ಪುನೀತ್ ದೊಡ್ಡಮನೆ ಹುಡುಗ ಚಿತ್ರ ಮಾಡುವುದಾಗಿ ಹೇಳಿದ್ದರು. ಉಳಿದ ಸಿನಿಮಾಗಳ ಬಗ್ಗೆ ತಿಳಿಸಿರಲಿಲ್ಲ.
ಆದರೆ ಸೋಮವಾರ ಮಧ್ಯಾಹ್ನ ಸಂತೋಷ್ ಆನಂದ್ ರಾಮ್ ಅವರು ಪುನೀತ್ ತಮ್ಮ ಚಿತ್ರದಲ್ಲಿ ನಟಿಸಲು ಸಮ್ಮತಿ ಮುದ್ರೆ ನೀಡಿರುವುದಾಗಿ ಹೇಳಿ ಈ ಚಿತ್ರ ದೊಡ್ಡಮನೆ ಹುಡುಗ ಆದ ಬಳಿಕ ಕೆಲಸ ಆರಂಭ ಮಾಡುತ್ತದೆ ಎನ್ನುವ ಸಂಗತಿ ಹೇಳಿದ್ದಾರೆ. ಅಂದರೆ ಈ ವರ್ಷದ ಕೊನೆಯಲ್ಲಿ ಚಿತ್ರದ ಕೆಲಸ ಆರಂಭವಾಗುತ್ತದೆ. ಈಗ ಚಿತ್ರಕಥೆಯ ಕೆಲಸದಲ್ಲಿ ಮಗ್ನರಾಗಿದ್ದು, ಶೂಟಿಂಗ್ ಆರಂಭವಾಗಲು ಸಾಕಷ್ಟು ಸಮಯ ಇರುವುದಾಗಿ ಸಹಿತ ಹೇಳಿದ್ದಾರೆ. ಈ ಚಿತ್ರಕ್ಕೆ ನಿನ್ನಿಂದಲೇ ಚಿತ್ರ ನಿರ್ಮಿಸಿದ್ದ ವಿಜಯ್ ಕಿರಿಂಗದೂರ್ ಅವರು ಹಣ ಹೂಡಲಿದ್ದಾರೆ ಎಂದು ಸತೊಶ್ ಹೇಳಿದ್ದಾರೆ.ಪ್ರಸ್ತುತ ವಿಜಯ್ ಅವರು ಯಶ್ ನಟನೆಯ ಮಾಸ್ಟರ್ ಪೀಸ್ ಚಿತ್ರ ನಿರ್ಮಾಣ ಮಾಡುತ್ತಿದ್ದಾರೆ.
