ಬೆಂಗಳೂರು: ಕಿರುತೆರೆ ಲೋಕದಲ್ಲಿ ಅಗ್ನಿಸಾಕ್ಷಿ ಧಾರವಾಹಿಯ ಸಿದ್ದಾರ್ಥ್-ಸನ್ನಿಧಿ ಜೋಡಿ ಎವರ್ ಗ್ರೀನ್ ಹಿಟ್ ಜೋಡಿ. ಸಿದ್ದಾರ್ಥ್ ಪಾರ್ತದಲ್ಲಿ ವಿಜಯ್ ಸೂರ್ಯ, ಸನ್ನಿಧಿ ಪಾತ್ರದಲ್ಲಿ ವೈಷ್ಣವಿ ಗೌಡ ಮಾಡಿದ್ದ ಮೋಡಿ ಯಾರೂ ಮರೆಯಲಾಗದು.
ಕಲರ್ಸ್ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಧಾರವಾಹಿ ನಿಂತು ಎಷ್ಟೋ ಸಮಯವೇ ಆದರೂ ಜನ ಈಗಲೂ ವೈಷ್ಣವಿ ಗೌಡರನ್ನು ಸನ್ನಿಧಿ ಎಂದೇ ಗುರುತಿಸುತ್ತಾರೆ. ಇದೀಗ ವೈಷ್ಣವಿ ಜೀ ಕನ್ನಡ ವಾಹಿನಿಗೆ ಶಿಫ್ಟ್ ಆಗಿದ್ದು, ಸೀತಾರಾಮ ಎನ್ನುವ ಹೊಸ ಧಾರವಾಹಿಯಲ್ಲಿ ನಾಯಕಿಯಾಗಿ ಅಭಿನಯಿಸಲಿದ್ದಾರೆ.
ಈ ಧಾರವಾಹಿಯಲ್ಲಿ ವೈಷ್ಣವಿ, ಪುಟ್ಟಗೌರಿ ಮದುವೆ ಖ್ಯಾತಿಯ ಗಗನ್ ಚಿನ್ನಪ್ಪಗೆ ಜೋಡಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಧಾರವಾಹಿಯ ಟೈಟಲ್ ಟ್ರ್ಯಾಕ್ ಬಿಡುಗಡೆಯಾಗಿದ್ದು, ಈ ಸುಮಧುರ ಹಾಡಿನಲ್ಲಿ ಇಬ್ಬರೂ ಕಾಣಿಸಿಕೊಂಡಿರುವುದನ್ನು ನೋಡಿ ವೈಷ್ಣವಿ ಫ್ಯಾನ್ಸ್ ಈ ಜೋಡಿ ಸಿದ್ಧ್-ಸನ್ನಿಧಿ ಜೋಡಿಯನ್ನೂ ಮೀರಿಸಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಜುಲೈ 17 ರಿಂದ ಧಾರವಾಹಿ ಪ್ರಸಾರ ಆರಂಭಿಸಲಿದ್ದು, ಡ್ರಾಮಾ ಜ್ಯೂನಿಯರ್ಸ್ ಖ್ಯಾತಿಯ ಬಾಲ ನಟಿ ರಿತು ಸಿಂಗ್ ಕೂಡಾ ಪ್ರಮುಖ ಪಾತ್ರದಲ್ಲಿದ್ದಾರೆ.
