ದಶಕದ ಹಿಂದೆ ಬಾಲಿವುಡ್ ಚಿತ್ರ ಜಗತ್ತಿನ ಶ್ರೇಷ್ಠ ನಟಿ ಎಂಬ ಹೆಗ್ಗಳಿಗೆ ಪಾತ್ರವಾಗಿದ್ದ ರಾಣಿ ಮುಖರ್ಜಿ, ಇನ್ನೊರ್ವ ಖ್ಯಾತ ನಟಿ ಕಾಜೋಲ್ ಅವರ ಹತ್ತಿರದ ಸಂಬಂಧಿ. ಹಿಂದಿ ಚಿತ್ರ ಜಗತ್ತಿನ ಇತ್ತೀಚಿನ ಎಲ್ಲ ಪ್ರಮುಖ ನಟರೊಂದಿಗೆ ಅಭಿನಯಿಸಿದ ಕೀರ್ತಿಗೆ ಪಾತ್ರರಾಗಿರುವ ರಾಣಿ, ಬಾಲಿವುಡ್ ಚಿತ್ರ ಜಗತ್ತಿನ ರಾಣಿ ಜೇನು ಎಂದೆ ಪ್ರಸಿದ್ದಿ ಗಳಿಸಿದ್ದಾರೆ.
'ರಾಜಾ ಕಿ ಆಯೆಗಿ ಬರಾತ್' ಚಿತ್ರದ ಮೂಲಕ ಚಿತ್ರ ಜಗತ್ತಿಗೆ ಕಾಲಿಟ್ಟ ರಾಣಿ ನಂತರ ಹಲವಾರು ಏಳು ಬೀಳುಗಳನ್ನು ಕಂಡಿದ್ದಾರೆ. ಅಮೀರಖಾನ್ ಅವರ ಮಹತ್ವಾಕಾಂಕ್ಷೆಯ 'ಮಂಗಲಪಾಂಡೆ'ನಲ್ಲಿ ಮನೋಜ್ಞ ಅಭಿನಯ ನೀಡಿದ ರಾಣಿ, 'ಬಂಟಿ ಔರ್ ಬಬ್ಲಿ' ಮತ್ತು 'ಗುಲಾಮ್' 'ಚಲ್ತೆ ಚಲ್ತೆ' 'ಪಹೇಲಿ' 'ಕುಚ್ ಕುಚ್ ಹೋತಾ ಹೈ' ನಂತಹ ಕಮರ್ಷಿಯಲ್ ಚಿತ್ರಗಳನ್ನು ನೀಡಿ ನಿರ್ಮಾಪಕರ ಬೊಕ್ಕಸವನ್ನು ಬಲಿಷ್ಠಗೊಳಿಸಿದ್ದಾರೆ.
'ಕುಚ್ ಕುಚ್ ಹೋತಾ ಹೈ' ಚಿತ್ರದಲ್ಲಿನ ಅತ್ಯುತ್ತಮ ಅಭಿನಯಕ್ಕಾಗಿ ರಾಣಿ ಅತ್ಯುತ್ತಮ ಪೋಷಕ ನಟಿ, 2004ರಲ್ಲಿ 'ಯುವ' ಚಿತ್ರದ ಅಭಿನಯಕ್ಕಾಗಿ ಅತ್ಯುತ್ತಮ ಪೋಷಕ ನಟಿ ಮತ್ತು 2005ರಲ್ಲಿ 'ಬ್ಲಾಕ್' ಚಿತ್ರದ ಮನೋಜ್ಞ ಅಭಿನಯಕ್ಕಾಗಿ ಅತ್ಯುತ್ತಮ ಶ್ರೇಷ್ಠ ನಟಿ ಎಂದು ಫಿಲ್ಮಫೇರ್ ಪ್ರಶಸ್ತಿಯನ್ನು ಗಳಿಸಿದ್ದಾರೆ.