ಶಿವಲಿಂಗ ಪತ್ತೆ: ಮುಂದುವರೆದ ಭಕ್ತರ ಹರಿವು

ಎರಡನೆಯ ಶ್ರೀಶೈಲ ಎನಿಸಿಕೊಂಡಿರುವ ಕಲ್ಬುರ್ಗಿಯ ಅಫಜಲಪುರ ಗ್ರಾಮದ ಗೌರ್(ಕೆ) ಗ್ರಾಮದ ಭೂಗರ್ಭದಲ್ಲಿ ಪತ್ತೆಯಾಗಿರುವ ಶಿವಲಿಂಗಗಳಿಗೆ ಪೂಜೆ ಸಲ್ಲಿಸಲು ಭಕ್ತರ ಹರಿವು ಸಾಗರೋಪಾದಿಯಲ್ಲಿ ಇಂದು ಕೂಡ ಮುಂದುವರೆದಿದೆ. ಅದರಲ್ಲೂ ಇಂದು ಸೋಮವಾರವಾಗಿರುವುದರಿಂದ ಹೊರರಾಜ್ಯಗಳಿಂದಲೂ ಜನರು ಬಂದು ಶಿವಪೂಜೆ ನಡೆಸುತ್ತಿದ್ದಾರೆ. ಸ್ಥಳದಲ್ಲಿ ಕುಳಿತು ಭಜನೆಯನ್ನು ಮಾಡುತ್ತಿದ್ದಾರೆ. 

ಭೂಗರ್ಭದಲ್ಲಿ 20 ಅಡಿ ಆಳದಲ್ಲಿ ಪತ್ತೆಯಾಗಿರುವ ಈ ಶಿವಲಿಂಗಗಳು ಮಲ್ಲಿಕಾರ್ಜುನ ದೇವಸ್ಧಾನದ ಅವಶೇಷಗಳು ಎಂದು ಹೇಳಲಾಗುತ್ತಿದೆ.

ಇಂದು ಕೇಂದ್ರ ಪ್ರಾಚ್ಯವಸ್ತು ಸರ್ವೇಕ್ಷಣಾ ಇಲಾಖೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಇದು ಬಹಳ ಹಳೆಯ ದೇವಸ್ಥಾನವಲ್ಲ. 18 ರಿಂದ 19ನೆಯ ಶತಮಾನದಲ್ಲಿ ನಿರ್ಮಾಣವಾಗಿದ್ದಾಗಿರಬಹುದು. ಚಾಲುಕ್ಯರ, ರಾಷ್ಟ್ರಕೂಟರ ವಾಸ್ತುಶಿಲ್ಪಕ್ಕೆ ಹೋಲಿಕೆ ಇಲ್ಲ. ಪ್ರವಾಹದಿಂದಾಗಿ ಮುಚ್ಚಿ ಹೋಗಿರುವ ಸಾಧ್ಯತೆ ಇದೆ. ಜಿಲ್ಲಾಡಳಿತದ ಜತೆ ಚರ್ಚಿಸಿ ಉತ್ಖನನ ಕಾರ್ಯ ಮಾಡುತ್ತೇವೆ ಎಂದು ಕೇಂದ್ರ ಪ್ರಾಚ್ಯವಸ್ತು ಸರ್ವೇಕ್ಷಣಾ ಇಲಾಖೆಯ ಸಹಾಯಕ ಅಧಿಕಾರಿ ಕಿಶೋರ್ ರಘುಬನ್ ತಿಳಿಸಿದ್ದಾರೆ.