ಅಯೋಧ್ಯಾ : ಈ ಬಾರಿ ಉತ್ತರಪ್ರದೇಶದ ಅಯೋಧ್ಯೆಯಲ್ಲಿ ಅದ್ಧೂರಿಯಾಗಿ ರಾಮೋತ್ಸವ ನಡೆಸಲು ಯೋಗಿ ಆದಿತ್ಯನಾಥ್ ಸರ್ಕಾರ ಸಿದ್ಧತೆ ನಡೆಸಿದೆ.
ಹಾಗೆಯೇ ದೀಪಾವಳಿಯನ್ನು ವಿಶಿಷ್ಟ, ಸ್ಮರಣೀಯವಾಗಿಸಲು ತೀರ್ಮಾನಿಸಲಾಗಿದೆ. ಅದಕ್ಕಾಗಿ 500 ಡ್ರೋನ್ಗಳ ಪ್ರದರ್ಶನವೊಂದು; ದೀಪಾವಳಿಯ ಹಿಂದಿನ ದಿನವಾದ ನ.3ರಂದು, ಅಯೋಧ್ಯೆಯ ಬಾನಿನಲ್ಲಿ ನಡೆಯಲಿದೆ.
ಅದರ ಮೂಲಕ ಶ್ರೀರಾಮ ಅಯೋಧ್ಯೆಗೆ ಹಿಂತಿರುಗಿದ್ದು ಹಾಗೂ ರಾಮಾಯಣದ ವಿವಿಧ ಘಟನೆಗಳನ್ನು ಕೂಡಿಸಿ 12 ನಿಮಿಷದ ಪ್ರದರ್ಶನ ನಡೆಯಲಿದೆ. ಇದನ್ನು ನಡೆಸಿಕೊಡಲಿರುವುದು ಇಂಟೆಲ್. ಈ ಸಂಸ್ಥೆ ಟೋಕಿಯೋ ಒಲಿಂಪಿಕ್ಸ್ನಲ್ಲಿ 1,824 ಡ್ರೋನ್ಗಳ ಮೂಲಕ ಆಗಸದಲ್ಲಿ ಕಬುಕಿ ಲಾಂಛನವನ್ನೇ ಸೃಷ್ಟಿಸಿತ್ತು. ಅದು ವಿಶ್ವವಿಖ್ಯಾತವಾಗಿತ್ತು. ಈ ಹಿನ್ನೆಲೆಯಲ್ಲಿ ಅದೇ ಸಂಸ್ಥೆಗೆ ಯೋಗಿ ಸರ್ಕಾರ ಅಯೋಧ್ಯೆಯ ಹೊಣೆಯನ್ನು ಹೊರಿಸಿದೆ.
ಈ ಪ್ರದರ್ಶನಕ್ಕೆ ಕ್ವಾಡ್ಕಾಪ್ಟರ್ ಅಥವಾ ಮಲ್ಟಿರೊಟಾರ್ಗಳಿರುವ ಡ್ರೋನ್ಗಳನ್ನು ಬಳಸಿಕೊಳ್ಳಲಾಗುತ್ತದೆ. ಇವುಗಳು ಎಲ್ಇಡಿ ದೀಪಗಳನ್ನು ಹೊಂದಿರುತ್ತವೆ.
