ಜಂಟಿ ಹೇಳಿಕೆಯಲ್ಲಿ ಮಾಧ್ಯಮವನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ ಚಾಬಹರ್ ಬಂದರು ಮತ್ತು ಸಂಬಂಧಿಸಿದ ಮೂಲಸೌಲಭ್ಯ ಅಭಿವೃದ್ಧಿ ಹಾಗೂ ಭಾರತದಿಂದ 500 ದಶಲಕ್ಷ ಡಾಲರ್ ಲಭ್ಯತೆಯ ಒಪ್ಪಂದವು ಮುಖ್ಯ ಮೈಲಿಗಲ್ಲಾಗಿದೆ ಎಂದು ತಿಳಿಸಿದರು. ಇರಾನ್ ದೇಶಕ್ಕೆ ಭೇಟಿ ನೀಡುತ್ತಿರುವುದು ಮಹಾ ಸುಯೋಗವಾಗಿದೆ. ಭಾರತ ಮತ್ತು ಇರಾನ್ ಹೊಸ ಸ್ನೇಹಿತರಲ್ಲ. ಇತಿಹಾಸದಷ್ಟೇ ನಮ್ಮ ದೋಸ್ತಿಯೂ ಹಳೆಯದಾಗಿದೆ. ನಾವು ಪರಸ್ಪರರ ಬೆಳವಣಿಗೆ ಮತ್ತು ಸಂಪದಭಿವೃದ್ಧಿ ಹಿತಾಸಕ್ತಿಗಳನ್ನು ಸುಖ, ದುಃಖಗಳನ್ನು ಹಂಚಿಕೊಂಡಿದ್ದೇವೆ ಎಂದು ಮೋದಿ ಹೇಳಿದರು.
ಪ್ರಾದೇಶಿಕ ಸನ್ನಿವೇಶ ಮತ್ತು ಸಮಾನ ಕಾಳಜಿಯ ಜಾಗತಿಕ ವಿಷಯಗಳನ್ನು ಕುರಿತು ನಾವು ಅಭಿಪ್ರಾಯ ಹಂಚಿಕೊಂಡೆವು. ನಮ್ಮ ನೆಲಗಳಲ್ಲಿ ಅಸ್ಥಿರತೆ, ಮೂಲಭೂತವಾದ ಮತ್ತು ಭಯೋತ್ಪಾದನೆಯ ಶಕ್ತಿ ಹರಡುತ್ತಿರುವ ಬಗ್ಗೆ ಕಳವಳ ಹಂಚಿಕೊಂಡೆವು ಎಂದು ಪ್ರಧಾನಿ ನುಡಿದರು.
