ನೋಯ್ಡಾ: ವಿಶ್ವದಲ್ಲಿಯೇ ಅತಿ ಕಡಿಮೆ ದರದ ಸ್ಮಾರ್ಟ್‌ಫೋನ್ ಫ್ರೀಡಂ 251 ಮಾಡೆಲ್ ಹ್ಯಾಂಡ್‌ಸೆಟ್ ಮಾರುಕಟ್ಟೆಗೆ ಬಿಡುಗಡೆಗೊಳ್ಳಲು ಸಾಧ್ಯವಿಲ್ಲ ಎನ್ನುವ ಹಲವಾರು ಆರೋಪಗಳು ಮಧ್ಯೆ, ಕಂಪೆನಿಯ ವಿರುದ್ಧ ಎಫ್‌ಐಆರ್ ಕೂಡಾ ದಾಖಲಾಗಿತ್ತು. ಆದರೆ,ಯಾವುದಕ್ಕೂ ಹಿಂಜರಿಯದ ರಿಂಗಿಂಗ್ ಬೆಲ್ ಸಂಸ್ಥೆ, ಪ್ರಸ್ತುತ ಎರಡು ಲಕ್ಷ ಫ್ರೀಡಂ 251 ಮೊಬೈಲ್ ಹ್ಯಾಂಡ್‌ಸೆಟ್‌ಗಳನ್ನು ಗ್ರಾಹಕರಿಗೆ ವಿತರಿಸಲು ಸಿದ್ದವಾಗಿದೆ ಎಂದು ಕಂಪೆನಿಯ ವಕ್ತಾರರು ತಿಳಿಸಿದ್ದಾರೆ.
ಸಂಸ್ಥೆ ಈಗಾಗಲೇ 2 ಲಕ್ಷ ಫ್ರೀಡಂ 251 ಸ್ಮಾರ್ಟ್‌ಪೋನ್‌ಗಳನ್ನು ಸಿದ್ಧಪಡಿಸಿದೆ. ಜೂನ್ 30 ರಿಂದ ಗ್ರಾಹಕರಿಗೆ ವಿತರಿಸುವ ಕಾರ್ಯ ಆರಂಭವಾಗಲಿದೆ. ಮೊದಲು ನೋಂದಣಿ ಮಾಡಿಕೊಂಡಿರುವ 2 ಲಕ್ಷ ಗ್ರಾಹಕರಿಗೆ ಸ್ಮಾರ್ಟ್‌ಪೋನ್‌ಗಳನ್ನು ವಿತರಿಸಿ, ನಂತರ ಮತ್ತೆ ಬುಕ್ಕಿಂಗ್ ಪ್ರಾರಂಭ ಮಾಡುತ್ತೇವೆಂದು ಮೋಹಿತ್ ಗೋಯಲ್ ತಿಳಿಸಿದ್ದಾರೆ.
ನಮ್ಮ ತಪ್ಪುಗಳಿಂದ ಪಾಠ ಕಲಿತಿದ್ದೇವೆ.ಆದ್ದರಿಂದ, ನಮ್ಮ ಉತ್ಪಾದನೆ ಮಾರುಕಟ್ಟೆಗೆ ಬರುವವರೆಗೆ ಮೌನವಾಗಿರಲು ನಿರ್ಧರಿಸಿದ್ದೇವೆ. ಇದೀಗ ನಮ್ಮ ಬಳಿ 4-ಇಂಚ್, ಡ್ಯೂಯೆಲ್ ಸಿಮ್ ಫೋನ್ ಗ್ರಾಹಕರಿಗೆ ವಿತರಿಸಲು ಸಿದ್ದವಾಗಿದೆ. ನಾವು ಗ್ರಾಹಕರಿಗೆ ನೀಡಿದ ಭರವಸೆಯನ್ನು ಈಡೇರಿಸಿದ ಸಂತಸವಿದೆ ಎಂದು ಹೇಳಿದ್ದಾರೆ.
ವಿಶ್ವದಲ್ಲಿ ಅತೀ ಕಡಿಮೆ ಬೆಲೆಯ ಪ್ರೀಡಂ 251 ಸ್ಮಾರ್ಟ್‌ಪೋನ್‌ಗಳು 1.3 ಜಿಎಚ್‌ಝಡ್ ಕ್ವಾಡ್ ಕೋರ್ ಪ್ರೊಸೆಸರ್, 1 ಜಿಬಿ ರ್ಯಾಮ್ ಮತ್ತು 8 ಜಿಬಿ ಆಂತರಿಕ ಸ್ಟೋರೇಜ್ ಸಾಮರ್ಥ್ಯ ಹೊಂದಿದೆ. ಈ ಪೋನ್‌ಗಳು 8 ಮೆಗಾ ಪಿಕ್ಸೆಲ್ ರಿಯರ್ ಕ್ಯಾಮೆರಾ ಮತ್ತು 3.2 ಮೆಗಾ ಪಿಕ್ಸೆಲ್ ಫ್ರಂಟ್ ಕ್ಯಾಮೆರಾ, 1800 ಎಮ್‌ಎಚ್‌ಝಡ್ ಬ್ಯಾಟರಿ ಮತ್ತು ಆಂಡ್ರಾಯ್ಡ್ 5.1 ಲಾಲಿಪಾಪ್ ವೈಶಿಷ್ಟ್ಯ ನೀಡುವುದಾಗಿ ಸಂಸ್ಥೆ ಭರವಸೆ ನೀಡಿದೆ.
