ಬೆಂಗಳೂರು: ಗಟ್ಟಿಮೇಳ ಧಾರವಾಹಿಯ ವಿಕ್ರಾಂತ್ ಪಾತ್ರದಿಂದ ಜನ ಮನ ಗೆದ್ದಿರುವ ನಟ ಅಭಿಷೇಕ್ ರಾಮ್ ದಾಸ್ ಈಗ ಸೋಲೋ ಹೀರೋ ಆಗಿ ಅಭಿನಯಿಸುತ್ತಿರುವ ‘ನಗುವಿನ ಹೂಗಳ ಮೇಲೆ’ ಸಿನಿಮಾ ರಿಲೀಸ್ ಗೆ ರೆಡಿಯಾಗಿದೆ.
ಈ ಮೊದಲು ಕೆಂಪಿರ್ವೆ ಎನ್ನುವ ಸಿನಿಮಾ ನಿರ್ದೇಶಿಸಿದ್ದ ವೆಂಕಟ್ ಭಾರದ್ವಾಜ್ ನಿರ್ದೇಶನದ ಸಿನಿಮಾ ನಗುವಿನ ಹೂಗಳ ಮೇಲೆ. ಈ ಸಿನಿಮಾ ಫೆಬ್ರವರಿ 9 ರಂದು ರಾಜ್ಯಾದ್ಯಂತ ಸುಮಾರು 200 ಕ್ಕೂ ಹೆಚ್ಚು ಥಿಯೇಟರ್ ಗಳಲ್ಲಿ ಬಿಡುಗಡೆಯಾಗುತ್ತಿದೆ. ಹೊಸಬರೇ ಮಾಡಿರುವ ಯೂಥ್ ಫುಲ್ ಸ್ಟೋರಿ ಇರುವ ಸಿನಿಮಾ. ಅಭಿಷೇಕ್ ರಾಮ್ ದಾಸ್ ನಾಯಕರಾಗಿರುವ ಸಿನಿಮಾದಲ್ಲಿ ಗಟ್ಟಿಮೇಳ ಧಾರವಾಹಿ ಖ್ಯಾತಿಯ ಶರಣ್ಯಾ ಶೆಟ್ಟಿ ನಾಯಕಿಯಾಗಿ ಅಭಿನಯಿಸಿದ್ದಾರೆ. ಜೊತೆಗೆ ಗಿರೀಶ್ ಬೆಟ್ಟಪ್ಪ, ಆಶಾ, ಸುಜಯ್ ಮುಂತಾದವರ ತಾರಾಗಣವಿದೆ.
ಏಕಾಂಗಿ ಹೀರೋ ಆಗಿ ಅಭಿಷೇಕ್ ಗೆ ಮೊದಲ ಸಿನಿಮಾ
ರೆಬಲ್ ಸ್ಟಾರ್ ಅಂಬರೀಶ್ ಜೊತೆ ಅಂಬಿ ನಿಂಗೆ ವಯಸ್ಸಾಯ್ತೋ ಸಿನಿಮಾದಲ್ಲಿ ನಟಿಸಿದ್ದರೂ ನಟ ಅಭಿಷೇಕ್ ಗೆ ಖ್ಯಾತಿ ತಂದುಕೊಟ್ಟಿದ್ದು ಗಟ್ಟಿಮೇಳ ಧಾರವಾಹಿ. ಈಗಾಗಲೇ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ, ಮರೀಚಿ ಎಂಬಿತ್ಯಾದಿ ಸಿನಿಮಾಗಳಲ್ಲಿ ನಟಿಸಿದ್ದ ಅಭಿಷೇಕ್ ಗೆ ಏಕಾಂಗಿ ಹೀರೋ ಆಗಿ ಇದು ಮೊದಲ ಸಿನಿಮಾ. ಅದೂ ಮಾಸ್ ಕತೆಗೆ ಬೇಕಾದಂತಹ ಎಲ್ಲಾ ಅಂಶಗಳೂ ಈ ಸಿನಿಮಾದಲ್ಲಿದೆ. ಇಷ್ಟು ದಿನ ಚಾಕಲೇಟ್ ಬಾಯ್ ಇಮೇಜ್ ಹೊಂದಿದ್ದ ಅಭಿಷೇಕ್ ಈ ಸಿನಿಮಾದಲ್ಲಿ ಸಾಹಸ ದೃಶ್ಯಗಳಲ್ಲೂ ಅಭಿನಯಿಸಿದ್ದಾರೆ. ಇದಕ್ಕಾಗಿ ಸ್ಟಂಟ್ ತರಬೇತಿಯನ್ನೂ ಪಡೆದುಕೊಂಡಿದ್ದರಂತೆ. ಅಲ್ಲದೆ, ಈ ಮೊದಲು ಧಾರವಾಹಿಯಲ್ಲಿ ಜೊತೆಯಾಗಿ ಕೆಲಸ ಮಾಡಿದ ಶರಣ‍್ಯ ಅವರೇ ನಾಯಕಿಯಾಗಿರುವುದರಿಂದ ಹೊಂದಾಣಿಕೆ ಸುಲಭವಾಯಿತು. ಜೊತೆಗೆ ನಿಜ ಜೀವನದಲ್ಲಿ ಸ್ನೇಹಿತರಾಗಿರುವ ಗಿರೀಶ್ ಬೆಟ್ಟಪ್ಪ ಸಿನಿಮಾದಲ್ಲಿಯೂ ಸ್ನೇಹಿತನ ಪಾತ್ರ ಮಾಡಿದ್ದು, ತೆರೆ ಮೇಲೆ ಇಬ್ಬರ ಕಾಂಬಿನೇಷನ್ ಚೆನ್ನಾಗಿ ಮೂಡಿಬಂದಿದೆ ಎಂದಿದ್ದಾರೆ ಅಭಿಷೇಕ್.
ಮೂರು ವರ್ಷಗಳ ಹಿಂದೆಯೇ ಸಿನಿಮಾ ಸೆಟ್ಟೇರಿತ್ತು. ಆದರೆ ಕೊವಿಡ್ ನಿಂದಾಗಿ ಕೊಂಚ ಅಡಚಣೆಯಾಗಿತ್ತು. ಇದೀಗ ರಿಲೀಸ್ ಗೆ ಸಿದ್ಧವಾಗಿದೆ. ಈಗಾಗಲೇ ನಿರ್ದೇಶಕ ಎ. ಹರ್ಷ ಚಿತ್ರದ ಟ್ರೈಲರ್ ಬಿಡುಗಡೆ ಮಾಡಿದ್ದಾರೆ. ಟ್ರೈಲರ್ ನಲ್ಲಿರುವ ಹಿನ್ನಲೆ ಸಂಗೀತ ಗಮನ ಸೆಳೆಯುವಂತಿದೆ. ಈ ಸಿನಿಮಾಗೆ ಸಂಗೀತ ಸಂಯೋಜಿಸಿದವರು ಲವ್ ಪ್ರಾಣ್ ಮೆಹ್ತಾ. ಚಿತ್ರದಲ್ಲಿ ನಾಲ್ಕು ಹಾಡುಗಳಿವೆ.
ಈಗಾಗಲೇ ಚಿತ್ರತಂಡ ಕಾಲೇಜು, ಈವೆಂಟ್ ಗಳಲ್ಲಿ ಪ್ರಮೋಷನ್ ನಡೆಸಿದೆ. ಒಂದು ಡಿಸ್ಟೇನ್ಸ್ ರಿಲೇಷನ್ ಶಿಪ್ ಸ್ಟೋರಿ ಇರುವ ಸಿನಿಮಾ. ಹೀಗೊಂದು ಕತೆಯಿಟ್ಟುಕೊಂಡು ಬಂದ ಕನ್ನಡ ಸಿನಿಮಾಗಳು ಕಡಿಮೆ. ಹಾಗಾಗಿ ಈ ಸಿನಿಮಾ ಗೆಲ್ಲಬಹುದು ಎಂದು ನಿರೀಕ್ಷೆಯಲ್ಲಿದ್ದಾರೆ ಅಭಿಷೇಕ್.
