ಬೆಂಗಳೂರು: ಇತ್ತೀಚೆಗೆ ಕಿಚ್ಚ ಸುದೀಪ್ ಎಲ್ಲೇ ಹೋದರೂ ಅವರಿಗೆ ಮ್ಯಾಕ್ಸ್ ಸಿನಿಮಾ ಅಪ್ ಡೇಟ್ ಕೊಡಿ ಎಂದು ಕೇಳುತ್ತಲೇ ಇರುತ್ತಾರೆ. ಅಪ್ ಡೇಟ್ ಕೊಡಿ ಎಂಬ ಬೇಡಿಕೆಗೆ ಬೇಸತ್ತ ಕಿಚ್ಚ ಸುದೀಪ್ ಅಭಿಮಾನಿಗಳಿಗೆ ಪತ್ರ ಬರೆದಿದ್ದಾರೆ.
ಎಷ್ಟೋ ಮಂದಿ ಸುದೀಪ್ ಬಿಗ್ ಬಾಸ್ ಮತ್ತು ಸಿಸಿಎಲ್ ಕಮಿಟ್ ಮೆಂಟ್ ಗಳಿಂದಾಗಿ ಸಿನಿಮಾ ಕಡೆಗೆ ಇತ್ತೀಚೆಗೆ ಗಮನ ಕೊಡಲಾಗುತ್ತಿಲ್ಲ. ಹೀಗಾಗಿ ಮ್ಯಾಕ್ಸ್ ಸಿನಿಮಾ ಕೂಡಾ ಮುಂದವರಿಯುತ್ತಿಲ್ಲ ಎಂದು ಆರೋಪ ಮಾಡಿದ್ದರು. ಈ ಎಲ್ಲಾ ಆರೋಪಗಳಿಗೆ ಸೋಷಿಯಲ್ ಮೀಡಿಯಾದಲ್ಲಿ ಸುದೀಪ್ ಸುದೀರ್ಘ ಪ್ರತಿಕ್ರಿಯೆ ನೀಡಿದ್ದಾರೆ.
ಸುದೀಪ್ ಬರೆದ ಪತ್ರದಲ್ಲೇನಿದೆ?
ಹಲವಾರು ಮಂದಿ ಅಪ್ ಡೇಟ್ ಕೊಡಿ ಎಂದು ಟ್ವೀಟ್ ಗಳ ಸುರಿಮಳೆ ಮಾಡುತ್ತಿರುವುದು ನೋಡಿದರೆ ಕ್ರೇಜಿ ಎನಿಸುತ್ತದೆ. ಅಪ್ ಡೇಟ್ ಎನ್ನುವುದು ಇನ್ನೊಬ್ಬ ನಟ ಅಥವಾ ಅವರ ಸಿನಿಮಾಗಳ ಜೊತೆ ಪೈಪೋಟಿ ನಡೆಸಲು ಕೊಡುವಂತಹದ್ದು ಅಲ್ಲ. ಚಿತ್ರತಂಡ ಕೆಲಸ ಮುಗಿಸಿ ಜನರಿಗೆ ಏನನ್ನಾದರೂ ಹೇಳಬೇಕು ಎಂದು ಅನಿಸಿದಾಗ ಅದನ್ನು ಹೊರ ಹಾಕುತ್ತದೆ. ನನ್ನ ಕೆಲಸಗಳಿಗೆ ನಿಮ್ಮ ಪ್ರೋತ್ಸಾಹ ನನಗೆ ತೀವ್ರ ಖುಷಿ ತಂದಿದೆ. ಆದರೆ ವಿಪರ್ಯಾಸವೆಂದರೆ ಕೆಲವರು ಮ್ಯಾಕ್ಸ್ ಅಪ್ ಡೇಟ್ ನಿಧಾನವಾಗಲು ಬಿಗ್ ಬಾಸ್/ಸಿಸಿಎಲ್ ಚಟವಟಿಕೆಗಳೇ ಕಾರಣ ಎಂದು ದೂರುತ್ತಿದ್ದಾರೆ. ಮ್ಯಾಕ್ಸ್ ಬಗ್ಗೆ ನಾನು ಎಲ್ಲಕ್ಕಿಂತ ಹೆಚ್ಚು ಗಮನಕೊಡುತ್ತಿದ್ದೇನೆ. ಅದು ಅದರ ಪಾಡಿಗೆ ತಯಾರಾಗುತ್ತಿದೆ’ ಎಂದಿದ್ದಾರೆ ಕಿಚ್ಚ.
ಮ್ಯಾಕ್ಸ್ ಸಿನಿಮಾ ಕಡೆಯಿಂದ ಒಂದು ಪೋಸ್ಟರ್ ಬಿಟ್ಟರೆ ಇದುವರೆಗೆ ಯಾವುದೇ ಅಪ್ ಡೇಟ್ ಸಿಕ್ಕಿಲ್ಲ. ಹೀಗಾಗಿ ಜನ ಶೂಟಿಂಗ್ ಮುಗಿದಿಲ್ವಾ? ಟೀಸರ್ ಯಾವಾಗ, ರಿಲೀಸ್ ಯಾವಾಗ ಅಪ್ ಡೇಟ್ ಕೊಡಿ ಎಂದು ಕೇಳುತ್ತಲೇ ಇದ್ದಾರೆ. ಈ ಎಲ್ಲಾ ಅನುಮಾನಗಳಿಗೆ ಸುದೀಪ್ ಈಗ ಉತ್ತರ ನೀಡಿದ್ದಾರೆ.
