ಬೆಂಗಳೂರು: ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕರಾಗಿರುವ ಕಾಟೇರ ಸಿನಿಮಾ 100 ನೇ ದಿನ ಸಕ್ಸಸ್ ಪಾರ್ಟಿಯನ್ನು ಆಯೋಜಿಸಲಾಗಿತ್ತು. ಈ ವೇಳೆ ನಿರ್ಮಾಪಕ ರಾಕ್ ಲೈನ್ ಚಿತ್ರಕ್ಕಾಗಿ ದುಡಿದ ತಂತ್ರಜ್ಞರಿಗೆ ಕಾರು ಗಿಫ್ಟ್ ಮಾಡಿದ್ದಾರೆ.
ಕಾಟೇರ ಸಿನಿಮಾಗೆ ಕತೆ ಬರೆದ ಜಡೇಶ್ ಕುಮಾರ್ ಹಂಪಿ, ಸಂಭಾಷಣೆ ಬರೆದ ಮಾಸ್ತಿ ಮತ್ತು ನಟಿಸಿದ್ದ ಸೂರಜ್ ಗೆ ತಲಾ ಒಂದು ಕಾರು ಗಿಫ್ಟ್ ಮಾಡಲಾಗಿದೆ. ಸಾಮಾನ್ಯವಾಗಿ ಒಂದು ಸಿನಿಮಾ ಸಕ್ಸಸ್ ಆದ ಬಳಿಕ ತಂತ್ರಜ್ಞರನ್ನು ಯಾರೂ ಗುರುತಿಸುವುದೇ ಇಲ್ಲ. ಆದರೆ ಈ ಸಿನಿಮಾದಲ್ಲಿ ತಂತ್ರಜ್ಞರಿಗೆ ಈ ರೀತಿ ಗೌರವ ಸೂಚಿಸಲಾಗಿದೆ.
ಈ ಬಗ್ಗೆ ಪತ್ರಿಕಾಗೋಷ್ಠಿ ನಡೆಸಿದ ರಾಕ್ ಲೈನ್ ವೆಂಕಟೇಶ್ ಈ ಮೂವರಿಗೆ ಕಾರು ನೀಡಲು ತೀರ್ಮಾನಿಸಿದ್ದು ಯಾಕೆ ಎಂದೂ ಹೇಳಿದರು. ಸಿನಿಮಾ ಬಿಡುಗಡೆ ಬಳಿಕ ನಟ ಸೂರಜ್ ಗೆ ಅಪಘಾತವಾಗಿ ಸಂಕಷ್ಟಕ್ಕೀಡಾದರು. ಹೀಗಾಗಿ ಅವರಿಗೆ ಕಾರು ನೀಡಲು ತೀರ್ಮಾನಿಸಿದೆವು. ಜೊತೆಗೆ ಚಿತ್ರಕ್ಕೆ ಉತ್ತಮ ಸಂಭಾಷಣೆ, ಕತೆ ಬರೆದ ಮಾಸ್ತಿ, ಜಡೇಶ್ ಗೂ ಕಾರು ನೀಡಲು ತೀರ್ಮಾನಿಸಿದೆವು. ನಾನ, ದರ್ಶನ್, ತರುಣ್ ಸೇರಿಕೊಂಡು ಈ ತೀರ್ಮಾನ ಮಾಡಿದೆವು’ ಎಂದು ರಾಕ್ ಲೈನ್ ಹೇಳಿದ್ದಾರೆ.
ಕಾರು ನೀಡಿದ ಬಳಿಕ ಜಡೇಶ್ ನಟ ದರ್ಶನ್ ಬಳಿ ಕಾರು ಚಲಾಯಿಸಿ ಶುಭಾರಂಭ ಮಾಡಲು ಮನವಿ ಮಾಡಿದರು. ಅದರಂತೆ ದರ್ಶನ್ ಜಡೇಶ್ ಕಾರನ್ನು ಚಲಾಯಿಸಿ ಅವರಿಗೆ ಖುಷಿಕೊಟ್ಟರು. ಕಾಟೇರ ಚಿತ್ರತಂಡದ ಈ ನಡೆಗೆ ಮೆಚ್ಚುಗೆ ವ್ಯಕ್ತವಾಗಿದೆ.
