ಬೆಂಗಳೂರು: ರಿಯಲ್ ಸ್ಟಾರ್ ಉಪೇಂದ್ರ ಸಿನಿಮಾಗಳೆಂದರೆ ಹಾಗೆ. ಎವರ್ ಗ್ರೀನ್ ಆಗಿರುತ್ತದೆ. ಜನ ಈಗಲೂ ಅವರ ಸಿನಿಮಾಗಳನ್ನು ಹುಚ್ಚೆದ್ದು ನೋಡುತ್ತಾರೆ. ಅಂತಹದ್ದರಲ್ಲಿ ಈಗ ಸೂಪರ್ ಹಿಟ್ ಎ ಸಿನಿಮಾ ರಿ ರಿಲೀಸ್ ಆಗಿದೆ.
ಉಪೇಂದ್ರ ನಿರ್ದೇಶಿಸಿ, ನಟಿಸಿರುವ ಸೂಪರ್ ಹಿಟ್ ಸಿನಿಮಾಗಳಲ್ಲಿ ಎ ಸಿನಿಮಾ ಮೊದಲ ಪಂಕ್ತಿಯಲ್ಲಿ ಬರುತ್ತದೆ. ಈ ಸಿನಿಮಾ ಈಗ ರಿ ರಿಲೀಸ್ ಆಗಿದೆ. ಸ್ಯಾಂಡಲ್ ವುಡ್ ನಲ್ಲಿ ಇತ್ತೀಚೆಗೆ ಸ್ಟಾರ್ ನಟರ ಸಿನಿಮಾಗಳು ಬಿಡುಗಡೆಯಾಗದೇ ಚಿತ್ರಮಂದಿರ ಭಣಗುಡುತ್ತಿದೆ.
ಹೀಗಾಗಿ ಥಿಯೇಟರ್ ಮಾಲಿಕರು ಹಳೇ ಸಿನಿಮಾಗಳನ್ನು ರಿ ರಿಲೀಸ್ ಮಾಡುತ್ತಿದ್ದಾರೆ. ಕಳೆದ ವಾರ ಪುನೀತ್ ರಾಜ್ ಕುಮಾರ್ ಅವರ ಪವರ್ ಸಿನಿಮಾ ಥಿಯೇಟರ್ ನಲ್ಲಿ ರಿ ರಿಲೀಸ್ ಆಗಿತ್ತು. ಇದಾದ ಬಳಿಕ ಸಾಹಸಸಿಂಹ ಡಾ. ವಿಷ್ಣುವರ್ಧನ್ ಅವರ ಕೃಷ್ಣ ನೀ ಬೇಗನೆ ಬಾರೋ ಸಿನಿಮಾ ರಿಲೀಸ್ ಆಗಿತ್ತು. ಇದೀಗ ಉಪೇಂದ್ರ ಅವರ ಎ ಸಿನಿಮಾ ರಿಲೀಸ್ ಆಗಿದೆ.
ಬೆಂಗಳೂರಿನ ಪ್ರಸನ್ನ ಥಿಯೇಟರ್ ನಲ್ಲಿ ಸಿನಿಮಾ ರಿ ರಿಲೀಸ್ ಆಗಿದೆ. ಹಳೆಯ ಸಿನಿಮಾವಾದರೂ ಮಳೆಯ ನಡುವೆಯೂ ಈ ಸಿನಿಮಾ ಹೌಸ್ ಫುಲ್ ಪ್ರದರ್ಶನ ಕಂಡಿರುವುದು ವಿಶೇಷ. ಉಪ್ಪಿ ಎಂಟ್ರಿಗೆ ಜನ ಶಿಳ್ಳೆ ಹಾಕಿ ಸಂಭ್ರಮಿಸಿದ್ದಾರೆ. ಇಂದು ಬೆಳಿಗ್ಗೆ 7 ಗಂಟೆಗೆ ಶೋ ಆಯೋಜನೆಯಾಗಿತ್ತು.
