ಮೈಸೂರು: ಮುಡಾ ಹಗರಣದ ಉರುಳು ಸಿಎಂ ಸಿದ್ದರಾಮಯ್ಯ ಮತ್ತು ಅವರ ಪತ್ನಿಗೆ ಮತ್ತಷ್ಟು ಕಗ್ಗಂಟಾಗುತ್ತಿದೆ. ಇದೀಗ ಮತ್ತೊಂದು ಮುಡಾ ಸೈಟು ನುಂಗಿದ್ದಾರೆ ಎಂಬ ಆರೋಪ ಸಿದ್ದರಾಮಯ್ಯ ಪತ್ನಿ ವಿರುದ್ಧ ಕೇಳಿಬಂದಿದೆ.
ಆರ್ ಟಿಐ ಕಾರ್ಯಕರ್ತ ಗಂಗರಾಜು ಇಂತಹದ್ದೊಂದು ಗಂಭೀರ ಆರೋಪ ಮಾಡಿದ್ದಾರೆ. ಮುಡಾಗೆ ಸೇರಿದ 7 ಗುಂಟೆ ಜಾಗವನ್ನು ಕಳೆದ ವರ್ಷ ಪಾರ್ವತಿ ಸಿದ್ದರಾಮಯ್ಯ ತಮ್ಮದೆಂದು ನೋಂದಣಿ ಮಾಡಿಸಿಕೊಂಡಿದ್ದಾರೆ ಎಂದು ಆರೋಪಿಸಲಾಗಿದೆ. ಈ ಸೈಟು ಕೂಡಾ ಸಿಎಂ ಪತ್ನಿ ಹೆಸರಿನಲ್ಲಿದೆ.
ಮೈಸೂರಿನ ಕೆಆರ್ ಎಸ್ ರಸ್ತೆಯಲ್ಲಿರುವ 4 ಎಕರೆ 11 ಗುಂಟೆ ಜಾಗದ ಪೈಕಿ 20 ಗುಂಟೆ ಜಾಗವನ್ನು 1.85 ಕೋಟಿ ರೂ.ಗೆ ಸಿಎಂ ಪತ್ನಿ ಹೆಸರಿನಲ್ಲಿ ಖರೀದಿ ಮಾಡಲಾಗಿದೆ. ಈ ನಿವೇಶನದಲ್ಲಿ ಮೊದಲಿನ ಮಾಲಿಕರು 8998 ಚದರ ಅಡಿ ಜಾಗವನ್ನು ರಸ್ತೆಗಾಗಿ ಬಿಟ್ಟುಕೊಟ್ಟಿದ್ದರು.
ಆದರೆ ಸಿಎಂ ಪತ್ನಿ ಹೆಸರಿನಲ್ಲಿ ನಿವೇಶನ ನೋಂದಣಿ ಮಾಡಿಸುವಾಗ ಈ ಜಾಗವನ್ನೂ ಸೇರಿಸಿ ನೋಂದಣಿ ಮಾಡಲಾಗಿದೆ. ಮುಡಾಗೆ ಬಿಟ್ಟುಕೊಟ್ಟ ನಿವೇಶನವನ್ನು ತಮ್ಮ ಹೆಸರಿಗೆ ನೊಂದಾಯಿಸಿಕೊಂಡಿದ್ದು ಅಕ್ರಮವಾಗಿದ್ದು, ಸಿಎಂ ಪತ್ನಿ ವಿರುದ್ಧ ಈಗ ಮತ್ತೊಂದು ಆರೋಪ ಕೇಳಿಬಂದಿದೆ.
