Air India Plane Crash: ಊಟದ ತಟ್ಟೆ ಟೇಬಲ್ ಮೇಲೆ ಹಾಗೆಯೇ ಇತ್ತು.. ವಿಮಾನ ದುರಂತದ ಕರಾಳತೆ

Photo Credit: X

ಅಹಮ್ಮದಾಬಾದ್: ಗುಜರಾತ್ ನ ಅಹಮ್ಮದಾಬಾದ್ ನಲ್ಲಿ ನಡೆದ ವಿಮಾನ ದುರಂತದ ತೀವ್ರತೆಗೆ ಮೆಡಿಕಲ್ ಕಾಲೇಜು ಕ್ಯಾಂಟೀನ್ ನ ಈ ದೃಶ್ಯಗಳೇ ಸಾಕ್ಷಿಯಾಗಿದೆ. ಊಟದ ಟೇಬಲ್ ಮೇಲೆ ಅರ್ಧ ತಿಂದ ಊಟದ ತಟ್ಟೆಗಳು ಹಾಗೆಯೇ ಇದೆ. ಇದು ಘಟನೆಯ ಭೀಕರತೆಗೆ ಸಾಕ್ಷಿಯಾಗಿದೆ.

ಟೇಕ್ ಆಫ್ ಆದ ಐದೇ ನಿಮಿಷದಲ್ಲಿ ಏರ್ ಇಂಡಿಯಾ ವಿಮಾನ ಪತನಗೊಂಡಿದೆ. ಮೊದಲು ಮರಕ್ಕೆ ಢಿಕ್ಕಿ ಹೊಡೆದಿದ್ದು ಬಳಿಕ ಎದುರಿಗಿದ್ದ ಮೆಡಿಕಲ್ ಕಾಲೇಜು ಹಾಸ್ಟೆಲ್ ಮೇಲೆ ಹೊಡೆದಿದೆ. ಹಾಸ್ಟೆಲ್ ನ ಮೇಲ್ಭಾಗವನ್ನು ಸೀಳಿ ವಿಮಾನ ಪತನವಾಗಿದೆ.

ಹಾಸ್ಟೆಲ್ ನ ಮೇಲ್ಭಾಗದಲ್ಲಿ ಊಟದ ಹಾಲ್ ಇತ್ತು. ಪತನವಾಗುವ ಸಂದರ್ಭದಲ್ಲಿ ಸುಮಾರು 1.30 ಆಗಿದ್ದರಿಂದ ಆಗಷ್ಟೇ ವಿದ್ಯಾರ್ಥಿಗಳು ಊಟಕ್ಕಾಗಿ ಬಂದಿದ್ದರು. ಟೇಬಲ್ ಮೇಲೆ ತಟ್ಟೆ ಇಟ್ಟುಕೊಂಡು ಇನ್ನೇನು ಊಟ ಮಾಡಬೇಕೆನ್ನುವಾಗ ವಿಮಾನ ಅಪ್ಪಳಿಸಿದೆ.

ಇದರಿಂದ ತಿನ್ನುತ್ತಿದ್ದ ಊಟದ ತಟ್ಟೆಯೆಲ್ಲಾ ಚಲ್ಲಾಪಿಲ್ಲಿಯಾಗಿ ಬಿದ್ದಿದೆ. ಘಟನೆಯಲ್ಲಿ ಪ್ರಯಾಣಿಕರಷ್ಟೇ ಅಲ್ಲದೆ ವಿದ್ಯಾರ್ಥಿಗಳೂ ಸಾವನ್ನಪ್ಪಿದ್ದಾರೆ ಎಂದು ತಿಳಿದುಬಂದಿದೆ. ಆದರೆ ಸಾವಿನ ನಿಖರ ಸಂಖ್ಯೆ ಇನ್ನೂ ದೃಢಪಟ್ಟಿಲ್ಲ.