ನವದೆಹಲಿ: ಇನ್ನೇನು ಮದುವೆಗೆ ಕೆಲವೇ ಕ್ಷಣಗಳು ಬಾಕಿಯಿದೆ ಎನ್ನುವಾಗ ವೃತ್ತಿಯಲ್ಲಿ ಜಿಮ್ ಟ್ರೈನರ್ ಆಗಿದ್ದ ಮಗನನ್ನು ತಂದೆಯೇ ಹತ್ಯೆ ಮಾಡಿದ ಘಟನೆ ದೆಹಲಿಯಲ್ಲಿ ನಡೆದಿದೆ. ಈ ಘಟನೆ ಎಲ್ಲರನ್ನೂ ಬೆಚ್ಚಿಬೀಳಿಸಿದೆ.
ಮದುವೆಯ ದಿಬ್ಬಣ ಹೊರಡಲು ಸಿದ್ಧತೆಯಲ್ಲಿದ್ದ ಮಗನನ್ನು ತಂದೆಯೇ ಹಲವು ಬಾರಿ ಇರಿದಿದ್ದರಿಂದ ತೀವ್ರ ಗಾಯಗೊಂಡ ಆತ ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದಾನೆ. 29 ವರ್ಷದ ಗೌರವ್ ಸಿಂಘಾಲ್ ಮೃತಪಟ್ಟ ವ್ಯಕ್ತಿ. ಕೃತ್ಯವೆಸಗಿದ ಬಳಿಕ ತಂದೆಯೇ ಮಗನ ಮೃತದೇಹವನ್ನು ಎಳೆದುಕೊಂಡು ಕೊಠಡಿಯೊಂದರಲ್ಲಿ ಹಾಕಿದ್ದ. ಆ ಮೂಲಕ ತನ್ನ ಕೃತ್ಯ ತಕ್ಷಣವೇ ಯಾರಿಗೂ ತಿಳಿಯದಂತೆ ನೋಡಿಕೊಳ್ಳಲು ಪ್ರಯತ್ನಿಸಿದ್ದ ಎಂದು ಪೊಲೀಸರು ಹೇಳಿದ್ದಾರೆ.
ತಂದೆ ಮತ್ತು ಮಗನ ನಡುವೆ ಉತ್ತಮ ಬಾಂಧವ್ಯವಿರಲಿಲ್ಲ. ಮಗನ ಮೇಲಿನ ವೈಮನಸ್ಯದಿಂದಾಗಿ ಈ ಕೃತ್ಯವೆಸಗಸಲಾಗಿದೆ ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ ಎಂದು ಪೊಲೀಸರು ಹೇಳಿದ್ದಾರೆ. ಆದರೆ ಆ ಸಂದರ್ಭದಲ್ಲಿ ಕೊಲೆ ಮಾಡುವಂತಹ ಕಾರಣ ಏನಾಗಿತ್ತು ಎಂದು ಇನ್ನೂ ತನಿಖೆಯಿಂದ ಗೊತ್ತಾಗಬೇಕಿದೆ.
ಆದರೆ ಕೃತ್ಯದ ಬಗ್ಗೆ ತಪ್ಪೊಪ್ಪಿಕೊಂಡಿರುವ ತಂದೆ ತನಗೆ ಮಗನನ್ನು ಕೊಂದಿದ್ದಕ್ಕೆ ಯಾವುದೇ ಪಶ್ಚಾತ್ತಾಪವಿಲ್ಲ ಎಂದು ಹೇಳಿಕೊಂಡಿದ್ದಾನೆ. ಇದೀಗ ಆರೋಪಿ ಜೊತೆಗೆ ಆತನ ಕುಟುಂಬಸ್ಥರನ್ನೂ ಪೊಲೀಸರು ಕರೆಸಿ ವಿಚಾರಣೆ ನಡೆಸುತ್ತಿದ್ದಾರೆ. ಮೃತ ಗೌರವ್ ಮದುವೆ ಗುರುವಾರ ನಿಗದಿಯಾಗಿತ್ತು.
