ನವದೆಹಲಿ: ಆರ್ ಜೆಡಿ ಮುಖ್ಯಸ್ಥ ಲಾಲೂ ಪ್ರಸಾದ್ ಯಾದವ್ ತಾವು ಆಯೋಜಿಸಿದ್ದ ಬಿಜೆಪಿ ವಿರೋಧಿ ಆಂದೋಲನದ ಸಮಾವೇಶದ ತಿರುಚಿದ ಫೋಟೋ ಪ್ರಕಟಿಸಿ ತಮಾಷೆಗೊಳಗಾಗಿದ್ದಾರೆ.
ನಿನ್ನೆ ಪ್ರತಿಪಕ್ಷಗಳು ಲಾಲೂ ನೇತೃತ್ವದಲ್ಲಿ ಪಾಟ್ನಾದಲ್ಲಿ ಸಮಾವೇಶವೊಂದನ್ನು ಏರ್ಪಡಿಸಿದ್ದರು. ಇದಕ್ಕೆ ಶರದ್ ಯಾದವ್, ಅಖಿಲೇಶ್ ಯಾದವ್ ರಂತಹ ಲಾಲೂ ಮಿತ್ರ ನಾಯಕರೂ ಆಗಮಿಸಿದ್ದರು.
ಈ ಸಮಾವೇಶದ ಬಗ್ಗೆ ಟ್ವಿಟರ್ ನಲ್ಲಿ ಫೋಟೋ ಒಂದನ್ನು ಲಾಲೂ ಪ್ರಕಟಿಸಿದ್ದರು. ಅಲ್ಲದೆ, ಲಾಲೂ ಎದುರುಗಡೆ ಯಾವ ಮುಖವೂ ನಿಲ್ಲಲ್ಲ. ಎಷ್ಟು ಜನ ಇದ್ದಾರೆಂದು ನೀವೇ ಲೆಕ್ಕ ಮಾಡಿ ಎಂದೂ ಬರೆದುಕೊಂಡಿದ್ದರು.
ಆದರೆ ಈ ಫೋಟೋದ ಬಗ್ಗೆ ಅನುಮಾನಗಳು ಮೂಡಿದ್ದವು. ನಂತರ ಇದು ಲಾಲೂ ಬೆಂಬಲಿಗರು ಫೋಟೋಶಾಪ್ ನಲ್ಲಿ ಲಕ್ಷಾಂತರ ಜನರನ್ನು ಕಾಣುವಂತೆ ತಿರುಚಿದ ಫೋಟೋ ಎಂದು ತಿಳಿದುಬಂತು. ಇದಾದ ಮೇಲೆ ಲಾಲೂ ಮೇಲೆ ಟೀಕೆಗಳ ಸುರಿಮಳೆಯಾಯ್ತು.
