ಸಮಾಜವಾದಿ ನಾಯಕನ ಮೇಲೆ ಅತ್ಯಾಚಾರ ಆರೋಪ

ಚುನಾವಣೆ ಹತ್ತಿರವಾಗುತ್ತಿರುವ ಈ ಸಂದರ್ಭದಲ್ಲಿ ಉತ್ತರ ಪ್ರದೇಶದ ಆಡಳಿತಾರೂಢ ಸಮಾಜವಾದಿ ಪಕ್ಷಕ್ಕೆ ಇರಿಸುಮುರಿಸಾಗುವಂತಹ ಘಟನೆ ನಡೆದಿದೆ. ಪಕ್ಷದ ಹಿರಿಯ ನಾಯಕ ಅಶೋಕ್ ಪ್ರಧಾನ್ ಮತ್ತಿಬ್ಬರ ಜತೆ ಸೇರಿ ತನ್ನ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿದ್ದಾನೆ ಎಂದು ಮಹಿಳೆಯೋರ್ವಳು ದೂರಿದ್ದಾಳೆ. 

ತನ್ನ ಮಾವ ಮತ್ತು ಪಂಕಜ್ ಜಿಂದಾಲ್ ಎಂಬುವರ ಜತೆ ಸೇರಿ ಪ್ರಧಾನ್ ತನ್ನ ಮೇಲೆ ಕೀಚಕತನವನ್ನು ಮೆರೆದಿದ್ದಾರೆ ಎಂದು ಪೀಡಿತೆ ದೂರಿದ್ದಾಳೆ. 

ಪೀಡಿತೆಯ ಮದುವೆಯನ್ನು ಪ್ರಧಾನ್ ಮುಂದೆ ನಿಂತು ಮಾಡಿಸಿದ್ದರು ಎಂಬುದಿಲ್ಲಿ ಗಮನಾರ್ಹ ಅಂಶವಾಗಿದೆ. 

ಪತಿ, ಅತ್ತೆ-ಮಾವನೊಂದಿಗೆ ನೊಯ್ಡಾದಲ್ಲಿ ವಾಸವಾಗಿರುವ 24 ವರ್ಷದ ಪೀಡಿತೆ ಹೇಳುವ ಪ್ರಕಾರ ಕಳೆದ 11 ತಿಂಗಳಿಂದ ಆಕೆಯ ಮೇಲೆ ದೌರ್ಜನ್ಯವಾಗುತ್ತಿದೆ. ನನ್ನ ಪತಿ ಸದಾ ಕುಡಿದು ಹಿಂಸೆ ನೀಡುತ್ತಿದ್ದ. ನನ್ನ ಪತಿಯ ತಂದೆ ಮಾದಕ ದ್ರವ್ಯವನ್ನು ಬೆರೆಸಿದ ಪಾನೀಯ ಕುಡಿಸಿ ನನ್ನ ಮೇಲೆ ಅತ್ಯಾಚಾರವೆಸಗಿದ್ದ. ಮಾವನ ಜತೆ ಸೇರಿ ಪ್ರಧಾನ್ ಮತ್ತು ಜಿಂದಾಲ್ ಕೂಡ ಸಾಮೂಹಿಕ ಅತ್ಯಾಚಾರ ಎಸಗಿದ್ದರು ಎಂದಾಕೆ ದೂರಿನಲ್ಲಿ ತಿಳಿಸಿದ್ದಾಳೆ. 

ತಮ್ಮ ಮೇಲಿನ ಆರೋಪವನ್ನು ತಳ್ಳಿ ಹಾಕಿರುವ ಪ್ರಧಾನ್, ಮಹಿಳೆಯ ವಿರುದ್ಧ ಮಾನನಷ್ಟ ಮೊಕದ್ದಮೆಯನ್ನು ಹೂಡಲು ನಿರ್ಧರಿಸಿದ್ದಾರೆ.

ಪ್ರಧಾನ್ ಈ ಹಿಂದೆ ಭಾರತೀಯ ಜನತಾ ಪಕ್ಷದ ಜತೆ ಗುರುತಿಸಿಕೊಂಡಿದ್ದರು. 

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.