ಹೆಂಡತಿಯನ್ನೇ ಮಾರಿದ ಅಪ್ರಾಪ್ತ ಯುವಕ!

ಜೈಪುರ: 17 ವರ್ಷದ ಅಪ್ರಾಪ್ತ ಯುವಕನೊಬ್ಬ ತನ್ನ ಪತ್ನಿಯನ್ನೇ 55 ವರ್ಷದ ವಯೋವೃದ್ಧನಿಗೆ ಹಣಕ್ಕಾಗಿ ಮಾರಿದ ಹೇಯ ಘಟನೆ ರಾಜಸ್ಥಾನ್ ನಲ್ಲಿ ನಡೆದಿದೆ.

ಸಾಮಾಜಿಕ ಜಾಲತಾಣದ ಮೂಲಕ ಯುವತಿಯ ಪರಿಚಯ ಮಾಡಿಕೊಂಡಿದ್ದ ಯುವಕ ಬಳಿಕ ಮನೆಯವರ ಒಪ್ಪಿಗೆ ಪಡೆದು ಆಕೆಯನ್ನು ಮದುವೆಯಾಗಿದ್ದ. ಕೆಲವು ದಿನಗಳ ಬಳಿಕ ಕೆಲಸದ ನೆಪ ಹೇಳಿ ಪತ್ನಿಯೊಂದಿಗೆ ಝಾನ್ಸಿ ನಗರಕ್ಕೆ ಬಂದಿಳಿದಿದ್ದ. ಇಲ್ಲಿ 55 ವರ್ಷದ ವ್ಯಕ್ತಿಗೆ ಪತ್ನಿಯನ್ನು 1,80,000 ರೂ.ಗಳಿಗೆ ಮಾರಾಟ ಮಾಡಿದ್ದ.

ಬಳಿಕ ಆ ಹಣದಲ್ಲಿ ಹೊಸ ಸ್ಮಾರ್ಟ್ ಫೋನ್, ಭರ್ಜರಿ ಔತಣ ಮಾಡಿದ್ದ. ಅತ್ತ ಯುವತಿ ಬಗ್ಗೆ ಸುಳಿವು ಸಿಗದ ಹಿನ್ನಲೆಯಲ್ಲಿ ಆಕೆಯ ಮನೆಯವರು ಪೊಲೀಸರಿಗೆ ದೂರು ನೀಡಿದ್ದರು. ತನಿಖೆ ನಡೆಸಿದ ಪೊಲೀಸರಿಗೆ ಯುವತಿ ಮಾರಾಟವಾದ ವಿಚಾರ ತಿಳಿದುಬಂದಿದೆ. ಇದೀಗ ಯುವತಿಯನ್ನು ಪೋಷಕರಿಗೆ ಒಪ್ಪಿಸಲಾಗಿದ್ದು, ಆರೋಪಿ ಯುವಕನನ್ನು ಬಂಧಿಸಲಾಗಿದೆ.