ಧಾರವಾಹಿ ನೋಡುತ್ತಿರುವಾಗ ಚಿನ್ನಾಭರಣ ದೋಚಿದರು!

ಚೆನ್ನೈ: ಮಹಿಳೆಯರು ಧಾರವಾಹಿ ನೋಡುತ್ತಿರುವಾಗ ಕಳ್ಳರು ಮನೆಯಿಂದ ಚಿನ್ನಾಭರಣ ದೋಚಿದ ಘಟನೆ ತಮಿಳುನಾಡಿನಲ್ಲಿ ನಡೆದಿದೆ.

ಅಡಿಟರ್ ಮೇಘನಾಥನ್ ಎಂಬವರ ಮನೆಯಲ್ಲಿ ಕಳ್ಳತನವಾಗಿದೆ. ಮೇಘನಾಥನ್ ಮನೆಯಲ್ಲಿಲ್ಲದ ವೇಳೆ ಅವರ ಪತ್ನಿ ಸಂಬಂಧಿಕರೊಂದಿಗೆ ಟಿವಿ ನೋಡುತ್ತಿದ್ದರು. ಈ ವೇಳೆ ಮನೆಯ ಬಾಗಿಲು ಬಂದ್ ಮಾಡಲು ಮರೆತಿದ್ದರು. ಟಿವಿ ವಾಲ್ಯೂಂ ಜೋರಾಗಿ ಹಾಕಲಾಗಿತ್ತು.

ಇದರಿಂದಾಗಿ ಮನೆಯ ಹೊರಗೆ ಸದ್ದಾಗಿದ್ದು ಕೇಳಿಸುತ್ತಿರಲಿಲ್ಲ. ಇದನ್ನೇ ಬಂಡವಾಳವಾಗಿಸಿಕೊಂಡ ಕಳ್ಳರು ಮನೆಯೊಳಗೆ ನುಗ್ಗಿ ಸುಮಾರು 19 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ದೋಚಿ ಪರಾರಿಯಾಗಿದ್ದಾರೆ.