ಭಾರತದಲ್ಲಿ, ಮದುವೆ ಎನ್ನುವುದು ಕೇವಲ ಇಬ್ಬರ ಸಮ್ಮೀಲನವಲ್ಲ. ಬದಲಾಗಿ ಎರಡು ಕುಟುಂಬಗಳನ್ನು ಜತೆಗೂಡಿಸುವ ಒಂದು ಬಂಧನ. ಎಲ್ಲಾ ಸಿದ್ಧತೆಗಳ ಮತ್ತು ಆಹ್ಲಾದಕರ ಆಚರಣೆಯ ನಡುವೆ, ವಧು ಮತ್ತು ವರರು ತಾವಿಬ್ಬರು ಜತೆಯಾಗಿ ಎದುರಿಸಬೇಕಾಗಿರುವ ಭವಿಷ್ಯದ ಬಗ್ಗೆ ಗಂಭೀರವಾಗಿ ಯೋಚಿಸುವ ಅಗತ್ಯ ಕೂಡ ಇದೆ.
ಕೆಲವು ದಿನಗಳಿಂದ ಯೂಟ್ಯೂಬ್‌ನಲ್ಲಿ ಹರಿದಾಡುತ್ತಿರುವ ಕಿರುಚಿತ್ರವೊಂದು ಒಂದು ಮುಂದೆ ಸಂಗಾತಿಗಳಾಗಲಿರುವ ಯುವಕ-ಯುವತಿಯರು ಪರಷ್ಪರ ಕೇಳಿಕೊಳ್ಳಲೇಬೇಕಾದ ಪ್ರಶ್ನೆಯೊಂದನ್ನು ಹೈಲೈಟ್ ಮಾಡಿದೆ. ಸುಖೀ ವೈವಾಹಿಕ ಜೀವನವನ್ನು ಸುನಿಶ್ಚಿತಗೊಳಿಸಿಕೊಳ್ಳಲು ಮದುವೆಗೆ ಮುಂಚಿತವಾಗಿ ವೈದ್ಯಕೀಯ ಪರೀಕ್ಷೆಯನ್ನು ಮಾಡಿಸಿಕೊಳ್ಳಬೇಕಾದ ಪ್ರಾಮುಖ್ಯತೆಯನ್ನು ಈ ವಿಡಿಯೋದಲ್ಲಿ ತೋರಿಸಲಾಗಿದೆ. ವಿವಾಹಪೂರ್ವದಲ್ಲಿ ಹೆಚ್‌ಐವಿ/ಏಡ್ಸ್ ಪರೀಕ್ಷೆಗೊಳಪಡುವ ಅಗತ್ಯ ಅತ್ಯಂತ ಮಹತ್ವವಾದದ್ದು. ಈ ಮೂಲಕ ಮಾರಣಾಂತಿಕ ಕಾಯಿಲೆಯ ಅಪಾಯದಿಂದ ನಮ್ಮನ್ನು ನಾವು ರಕ್ಷಿಸಿಕೊಳ್ಳಬಹುದು ಎಂಬುದು ಈ ಕಿರುಚಿತ್ರದ ಸಾರ.
