ಕೋಲ್ಕೊತ್ತಾ: ಒಳಗೆ ಸೇರಿದರೆ ಗುಂಡು ಎಂದು ಮಾಲಾಶ್ರೀ ಹಾಡೊಂದಕ್ಕೆ ಹೆಜ್ಜೆ ಹಾಕಿದ್ದನ್ನು ನಾವು ನೋಡಿದ್ದೇವೆ. ಅಂತಹದ್ದೇ ಸಿನಿಮೀಯ ಘಟನೆ ಕೋಲ್ಕೋತ್ತಾದಲ್ಲಿ ನಡೆದಿದ್ದು, ಅದು ಅತಿರೇಕಕ್ಕೆ ಹೋಗಿದೆ.
ಕಂಠಪೂರ್ತಿ ಕುಡಿದಿದ್ದ ಮಹಿಳೆ ರಾತ್ರಿ ವೇಳೆ ಕಾರು ಚಲಾಯಿಸಿಕೊಂಡು ಹೋಗಿ ಟ್ಯಾಕ್ಸಿಯೊಂದಕ್ಕೆ ಡಿಕ್ಕಿ ಹೊಡೆದಿದ್ದಳು. ಆಗ ಟ್ಯಾಕ್ಸಿ ಡ್ರೈವರ್ ಮತ್ತು ಮಹಿಳೆ ನಡುವೆ ಜೋರಾಗಿ ವಾಗ್ವಾದ ನಡೆದಿದೆ. ಮದ್ಯದ ಅಮಲಿನಲ್ಲಿದ್ದ ಮಹಿಳೆ ಟ್ಯಾಕ್ಸಿ ಡ್ರೈವರ್ ಗೆ ಚೆನ್ನಾಗಿ ಹೊಡೆಯಲು ಪ್ರಾರಂಭಿಸಿಯೇ ಬಿಟ್ಟಳು. ಆಕೆ ಜತೆ ಕಾರಿನಲ್ಲಿ ಇನ್ನೊಬ್ಬ ಮಹಿಳೆ ಮತ್ತು ಪುರುಷನೂ ಇದ್ದರು.
ಕೊನೆಗೂ ಅಲ್ಲಿಗೆ ಬಂದ ಪೊಲೀಸ್ ಕಾನ್ಸ್ ಟೇಬಲ್ ಇವರ ಫೈಟಿಂಗ್ ಗೆ ಕೊನೆ ಹಾಡಿದ. ಆಗ ಮದ್ಯದ ಮತ್ತಿನಲ್ಲಿದ್ದ ಮಹಿಳೆಗೆ ಏನನಿಸಿತೋ, ಇದ್ದಕ್ಕಿದ್ದಂತೆ ಆ ಪೊಲೀಸ್ ಕಾನ್ಸ್ ಟೇಬಲ್ ನ್ನು ಹಿಡಿದು ಯದ್ವಾ ತದ್ವಾ ನಡು ರಸ್ತೆಯಲ್ಲೇ ಕಿಸ್ ಮಾಡಲು ಶುರುವಿಟ್ಟುಕೊಂಡಿದ್ದಾಳೆ! ಪೊಲೀಸ್ ಪೇದೆ ಗಾಬರಿಯಾಗಿ ಸ್ಥಳೀಯ ಮಹಿಳೆಯೊಬ್ಬರನ್ನು ಕರೆದು ಹೇಗಾದರೂ ಈ ಕಿಸ್ಸಿಂಗ್ ನಾರಿಯಿಂದ ಬಿಡಿಸಿಕೊಂಡು ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದಾನೆ. ಇದೀಗ ಕುಡಿದು ಕಾರು ಚಲಾಯಿಸಿದ ಪ್ರಕರಣ ಮಹಿಳೆ ಮೇಲೆ ದಾಖಲಾಗಿದೆ.
