ಕನ್ನಡದ ಕೋಟ್ಯಧಿಪತಿ ಮೊದಲ ಅವತರಣಿಕೆಯಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಮಾಡಿದ ಮೋಡಿಯನ್ನು ಯಾರು ತಾನೇ ಮರೆಯಲು ಸಾಧ್ಯ? ಅದೇ ಪುನೀತ್ ಈಗ ಮತ್ತೆ ಕಿರುತೆರೆ ಮೇಲೆ ಹಣದ ಥೈಲಿ ಹಿಡಿದುಕೊಂಡು ಬರಲು ರೆಡಿಯಾಗಿದ್ದಾರೆ. ಸ್ಪರ್ಧೆಯಲ್ಲಿ ಭಾಗವಹಿಸುವವರಿಗಾಗಿ ಆಡಿಷನ್ ಕೂಡ ಶುರುವಾಗಿದೆ.
ಈ ಬಾರಿಯೂ ಸುವರ್ಣ ಚಾನೆಲ್‌ನಲ್ಲೇ ಕಾರ್ಯಕ್ರಮ ಪ್ರಸಾರವಾಗುತ್ತಿದೆ. ಯಾವಾಗ ಆರಂಭ ಅನ್ನೋದು ಖಚಿತವಿಲ್ಲ. ಆದರೆ ಡಿಸೆಂಬರ್ 15ರಿಂದಲೇ ಪುನೀತ್ ತೆರೆಯ ಮೇಲೆ ಬರಲಿದ್ದಾರೆ. ಅವರು ಪ್ರತಿರಾತ್ರಿ ಕೇಳುವ ಪ್ರಶ್ನೆಗಳಿಗೆ ಉತ್ತರಿಸಿದವರನ್ನು ಆಯ್ಕೆ ಮಾಡಲಾಗುತ್ತದೆ. ಹಲವು ಸುತ್ತಿನ ಪ್ರಕ್ರಿಯೆ ಮುಗಿದ ನಂತರವಷ್ಟೇ ಸ್ಪರ್ಧಿಯಾಗಿ ಪುನೀತ್ ಎದುರು ಕೂರಲು ಅವಕಾಶ ಸಿಗುತ್ತದೆ.
ಕಾರ್ಯಕ್ರಮ ಮುಂದುವರಿಯುತ್ತಿರುವುದಕ್ಕೆ ಸುವರ್ಣ ಬಿಸಿನೆಸ್ ಹೆಡ್ ಅನೂಪ್ ಚಂದ್ರಶೇಖರ್ ಸಂತಸ ವ್ಯಕ್ತಪಡಿಸಿದ್ದಾರೆ. ಕರ್ನಾಟಕಕ್ಕೆ ಮತ್ತೆ ಬೃಹತ್ ರಿಯಾಲಿಟಿ ಶೋವನ್ನು ತರುತ್ತಿರುವುದು ಖುಷಿ ತಂದಿದೆ. ಮೊದಲ ಅವತರಣಿಕೆಗೆ ಉತ್ತಮ ಪ್ರತಿಕ್ರಿಯೆ ಸಿಕ್ಕಿತ್ತು. ಅದೇ ರೀತಿ ಈ ಬಾರಿಯೂ ಯಶಸ್ಸು ಸಿಗುವಂತೆ ಯೋಜನೆಗಳನ್ನು ರೂಪಿಸಿದ್ದೇವೆ. ಅದಕ್ಕಿಂತಲೂ ಚೆನ್ನಾಗಿರಬೇಕೆಂದು ಪ್ರಯತ್ನಿಸುತ್ತಿದ್ದೇವೆ.
ಪುನೀತ್ ಮತ್ತು ಬಿಗ್ ಸಿನೆರ್ಜಿ ಟೀಮ್ ಜತೆ ಕಾರ್ಯ ನಿರ್ವಹಿಸುವುದು ಅದ್ಭುತ ಅನುಭವ. ಮತ್ತೆ ಕನ್ನಡದ ಪ್ರೇಕ್ಷಕರಿಗೆ ಸುವರ್ಣ ವಾಹಿನಿ ಸಂಪೂರ್ಣ ಮನರಂಜನೆ ಒದಗಿಸಲು ಸಿದ್ಧವಾಗಿದೆ. ವೀಕ್ಷಕರಿಗೆ ಗುಣಮಟ್ಟದ ಕಾರ್ಯಕ್ರಮಗಳನ್ನು ನೀಡುವುದನ್ನು ಮುಂದುವರಿಸುತ್ತೇವೆ ಎಂದು ಅನೂಪ್ ತಿಳಿಸಿದ್ದಾರೆ.
ಕಾರ್ಯಕ್ರಮದ ಹೆಸರೇ ಹೇಳುವಂತೆ 'ಕೋಟ್ಯಧಿಪತಿ'ಯಲ್ಲಿ ಕೋಟಿ ಬಹುಮಾನದ ಆಫರ್ ನೀಡಲಾಗುತ್ತದೆ. ಆದರೆ ಕಳೆದ ಅವತರಣಿಕೆಯಲ್ಲಿ ಯಾರೂ ಕೋಟಿ ಗೆಲ್ಲಲಿಲ್ಲ. ಗರಿಷ್ಠ ಮೊತ್ತವನ್ನು ಪಡೆದದ್ದು ಪಂಪಣ್ಣ ಮಾಸ್ತರ್ ಎಂಬುವವರು. ಅವರು 50 ಲಕ್ಷ ರೂ. ಕಿಸೆಗೆ ಹಾಕಿಕೊಂಡಿದ್ದರು.
ಕೋಟ್ಯಧಿಪತಿ ಮೊದಲ ಅವತರಣಿಕೆಯಲ್ಲಿ ರಮ್ಯಾ, ಲಕ್ಷ್ಮಿ, ರವಿಚಂದ್ರನ್, ಅನಿಲ್ ಕುಂಬ್ಳೆ ಮುಂತಾದ ಜನಪ್ರಿಯರು ಅತಿಥಿಗಳಾಗಿ ಭಾಗವಹಿಸಿದ್ದರು. ಒಟ್ಟು 80 ಕಂತುಗಳಲ್ಲಿ ಕಾರ್ಯಕ್ರಮ ಪ್ರಸಾರವಾಗಿತ್ತು.
