ಮುಂಬೈ: ಕನ್ನಡದ ದೊಡ್ಮನೆ ಆಟಕ್ಕೆ ದಿನಗಣನೆ ಆರಂಭವಾಗಿದೆ. ಅದರ ಬೆನ್ನಲ್ಲೇ ಬಾಲಿವುಡ್‌ ನಟ ಸಲ್ಮಾನ್ ಖಾನ್ ನಡೆಸಿಕೊಡುವ ಹಿಂದಿ ಜನಪ್ರಿಯ ರಿಯಾಲಿಟಿ ಶೊ ಬಿಗ್ ಬಾಸ್‌ 18 ಆವೃತ್ತಿಯೂ ಆರಂಭವಾಗಲಿದೆ.
ಅಕ್ಟೋಬರ್‌ 6ರಂದು ಹಿಂದಿ ಬಿಗ್‌ಬಾಸ್‌ ಆರಂಭವಾಗಲಿದೆ ಎಂದು ವಾಹಿನಿ ತಿಳಿಸಿದ್ದು, ಈ ಕುರಿತು ಪ್ರೊಮೊ ವಿಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದೆ. ಇದಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.
ಕಲರ್ಸ್‌ ಹಿಂದಿ ಚಾನಲ್‌ನಲ್ಲಿ ಪ್ರಸಾರವಾವಾಗುವ ಈ ಬಿಗ್‌ಬಾಸ್‌ ಅನ್ನು ಜಿಯೊ ಸಿನಿಮಾದಲ್ಲೂ ವೀಕ್ಷಿಸಬಹುದಾಗಿದೆ.
ಪ್ರೀಮಿಯರ್‌ ದಿನಾಂಕವನ್ನು ವಾಹಿನಿ ತನ್ನ ಅಧಿಕೃತ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಪ್ರಕಟಿಸಿದೆ. ಈ ಬಾರಿಯ ಆವೃತಿಯ ಪರಿಕಲ್ಪನೆಯನ್ನು ಕಾರ್ಯಕ್ರಮದ ನಿರೂಪಕ ಸಲ್ಮಾನ್ ಖಾನ್ ವಿವರಿಸುವ ಪ್ರೋಮೊ ವಿಡಿಯೊವನ್ನು ಪೋಸ್ಟ್‌ ಮಾಡಲಾಗಿದೆ.
ಈ ಬಾರಿ ಬಿಗ್ ಬಾಸ್‌ನಲ್ಲಿ ಭೂಕಂಪ ಸಂಭವಿಸಲಿದೆ. ಯಾಕೆಂದರೆ ಈ ಬಾರಿ ಸಮಯ ಮೇಲುಗೈ ಸಾಧಿಸಲಿದೆ. ಬಿಗ್ ಬಾಸ್‌ 18ರ ಅದ್ಧೂರಿ ಪ್ರೀಮಿಯರ್‌ ಅಕ್ಟೋಬರ್‌ 6ರಂದು ರಾತ್ರಿ 9 ಗಂಟೆಗೆ ಕಲರ್ಸ್‌ನಲ್ಲಿ ಪ್ರಸಾರವಾಗಲಿದೆ ಎಂದು ವಿಡಿಯೊದಲ್ಲಿ ತಿಳಿಸಲಾಗಿದೆ.
