ಕೈಕೈ ಮಿಲಾಯಿಸಿದ ಕ್ರಿಕೆಟ್ ಅಭಿಮಾನಿಗಳು, ನಾಲ್ವರಿಗೆ ಗಾಯ

ನ್ಯೂ ಸೌತ್ ವೇಲ್ಸ್ ಕ್ಲಬ್‌ವೊಂದರಲ್ಲಿ ಪಾಕಿಸ್ತಾನ ಮತ್ತು ಭಾರತ ನಡುವೆ ಅಭಿಮಾನಿಗಳು ಪಂದ್ಯ ವೀಕ್ಷಿಸುತ್ತಿದ್ದಾಗ  ಪಾಕಿಸ್ತಾನ ಪಂದ್ಯದಲ್ಲಿ ಸೋಲುತ್ತಿದ್ದ ಹಾಗೆ ಪಾಕ್ ಹಾಗೂ ಭಾರತ ಅಭಿಮಾನಿಗಳು ಕೈಕೈ ಮಿಲಾಯಿಸಿ ಹೊಡೆದಾಡತೊಡಗಿದ್ದರಿಂದ ನಾಲ್ವರಿಗೆ ಗಂಭೀರ ಗಾಯಗಳಾಗಿವೆ. 

ಸುಮಾರು 40 ಜನರು ಕೈಕೈ ಮಿಲಾಯಿಸಿ ಹೊಡೆದಾಟಕ್ಕಿಳಿದರು. ಮೆರಿಲ್ಯಾಂಡ್ ಆರ್‌ಎಸ್ಎಲ್ ಕ್ಲಬ್ ರಣಾಂಗಣದಂತೆ ಗೋಚರಿಸಿತು. ಕುರ್ಚಿಗಳನ್ನು ಎತ್ತಿಕೊಂಡು ಒಬ್ಬರ ಮೈಮೇಲೊಬ್ಬರು ಪರಸ್ಪರ ಎರಚಾಡಿದರು.  ಅಡೆಲೈಡ್ ಓವಲ್‌ನಲ್ಲಿ ಸುಮಾರು 50,000 ಅಭಿಮಾನಿಗಳು ಕಡು ವೈರಿ ಪಾಕಿಸ್ತಾನದ ವಿರುದ್ಧ ವಿಜಯವನ್ನು ಸಂಭ್ರಮಿಸುತ್ತಿರುವ ನಡುವೆ  ಕ್ಲಬ್‌ನೊಳಗೆ 40 ಜನರು ಪರಸ್ಪರ ಹೊಡೆದಾಡಿಕೊಂಡರು. ನಾಲ್ವರನ್ನು ಗಂಭೀರವಾದ ಗಾಯಗಳೊಂದಿಗೆ ಆಸ್ಪತ್ರೆಗೆ ಸೇರಿಸಲಾಯಿತು.

ಭಾರತದ ಗೆಲುವಿಗೆ 20 ನಿಮಿಷಗಳ ಮುಂಚೆ ಕೆಲವು ಅತೀಭಾವುಕ ಅಭಿಮಾನಿಗಳು ತಳ್ಳಾಟ, ನೂಕಾಟ ಷುರುಮಾಡಿದರು. ಪಾಕಿಸ್ತಾನದ ಕಡೆ ಆಟಗಾರ ಸಿಕ್ಸರ್ ಬಾರಿಸಿದ ಕೂಡಲೇ ವ್ಯಕ್ತಿಯೊಬ್ಬ ಕುರ್ಚಿಯೊಂದನ್ನು ತೆಗೆದುಕೊಂಡು ಕೆಲವರ ಮೇಲೆ ಎಸೆದಿದ್ದು, ಗಲಾಟೆಗೆ ನಾಂದಿ ಹಾಡಿತು.

ಈ ದೃಶ್ಯಗಳನ್ನು ಸಿಸಿಟಿವಿ ಕ್ಯಾಮೆರಾಗಳು ಸೆರೆಹಿಡಿದಿವೆ. ಆಗ ಇನ್ನುಳಿದವರು ಮುಷ್ಠಿಕಾಳಗಕ್ಕೆ ಇಳಿದರು ಮತ್ತು ಪೀಠೋಪಕರಣಗಳನ್ನು ಎಸೆಯತೊಡಗಿದರು. ಪೊಲೀಸರು ಸಿಸಿಟಿವಿ ಕ್ಯಾಮೆರಾ ಗಮನಿಸುತ್ತಿದ್ದು, ಭಾಗಿಯಾದ ಎಲ್ಲರನ್ನೂ ಗುರುತಿಸುವ ಸಾಧ್ಯತೆಯಿದೆ.