ವಿದ್ಯುತ್ ಅಡಚಣೆಯಿಂದ ಎರಡು ಬಾರಿ ಪಂದ್ಯಕ್ಕೆ ಅಡ್ಡಿಯಾಯಿತು. ಎರಡನೇ ಬಾರಿ ಒಂದೆರಡು ಫ್ಲಡ್‌ಲೈಟ್ ಟವರ್‌ಗಳಲ್ಲಿ ದೀಪಗಳು ಸಂಪೂರ್ಣ ಆರಿಹೋದವು. ಎರಡು ಪ್ರತ್ಯೇಕ ಹಂತಗಳಲ್ಲಿ ಎರಡು ಟವರ್‌ಗಳಲ್ಲಿ ವಿದ್ಯುತ್ ಟ್ರಿಪ್ಪಿಂಗ್‌ನಿಂದಾಗಿ ಒಟ್ಟು 78 ನಿಮಿಷಗಳ ವಿದ್ಯುತ್ ಅಡಚಣೆ ಉಂಟಾಯಿತು. ಪಂದ್ಯದಲ್ಲಿ ಯುವರಾಜ್ ಸಿಂಗ್ ಅವರ ಇಂಡಿಯಾ ರೆಡ್ 48.2 ಓವರುಗಳನ್ನು ಆಡಿ 161 ರನ್‌ಗೆ ಬೌಲ್ಡ್ ಆಯಿತು. ಸಂದೀಪ್ ಶರ್ಮಾ 62 ರನ್ ನೀಡಿ 4 ವಿಕೆಟ್ ಕಬಳಿಸಿದರು.
ನಸುಗೆಂಪು ಚೆಂಡು ಮಧ್ಯಾಹ್ನದ ಸೆಷನ್‌ಗಿಂತ ಫ್ಲಡ್‌ಲೈಟ್ ಬೆಳಕಿನಲ್ಲಿ ಹೆಚ್ಚು ಸ್ವಿಂಗ್ ಆಗಿದ್ದು ಕಂಡುಬಂತು. ಪಂದ್ಯದ ಸಂದರ್ಭದಲ್ಲಿ ಪಿಂಕ್ ಕೂಕಾಬುರಾ ಚೆಂಡಿನ ಕಡೆ ಸಂಪೂರ್ಣ ಗಮನಹರಿಸಲಾಗಿತ್ತು. ಪ್ರಥಮ ಇನ್ನಿಂಗ್ಸ್‌ನ 48 ಓವರುಗಳಲ್ಲಿ ಚೆಂಡು ಹೊಳಪನ್ನು ಉಳಿಸಿಕೊಂಡಿತ್ತು. ನಸುಗೆಂಪು ಚೆಂಡಿಗಿಂತ ಇಂಡಿಯಾ ರೆಡ್ ಕಳಪೆ ಬ್ಯಾಟಿಂಗ್‌ನಿಂದ ನಿಯಮಿತ ವೇಳೆಯಲ್ಲಿ ವಿಕೆಟ್‌ಗಳನ್ನು ಕಳೆದುಕೊಂಡಿತು.
