ವೃತ್ತಿ ಪರ ಬಾಕ್ಸಿಂಗ್ ಸೆಣಸಾಟಗಳಿಗೆ ಮುನ್ನ ಬಾಕ್ಸರ್ಗಳು ತಮ್ಮ ಎದುರಾಳಿಗಳನ್ನು ಛೇಡಿಸುವ, ಹಂಗಿಸುವ ಮೂಲಕ ಗಮನ ಸೆಳೆಯುತ್ತಾರೆ. ಹಂಗರಿಯ ಮಿಡಲ್ ವೈಟ್ ಬಾಕ್ಸರ್ ಅಲೆಕ್ಸಾಂಡರ್ ಹೋರ್ವಾತ್ ಅವರು ವಿಜೇಂದರ್ ಅವರನ್ನು ಹಂಗಿಸಲು ಯತ್ನಿಸಲಿಲ್ಲ. ಆದರೆ ತಾನು ಹಾವಿನ ರಕ್ತ ಕುಡಿಯುವುದರಿಂದ ವಿಜೇಂದರ್ ಗಿಂತ ಶಕ್ತಿಶಾಲಿ ಎಂದು ತೋರಿಸಲು ಯತ್ನಿಸಿದ್ದಾರೆ.
ಈ ಮುಷ್ಠಿಕಾಳಗ ಕುರಿತು ಪ್ರತಿಕ್ರಿಯಿಸಿದ ವಿಜೇಂದರ್ ಅಲೆಕ್ಸಾಂಡರ್ಗೆ ಎಚ್ಚರಿಕೆ ನೀಡಿದ್ದಾರೆ. ಅವರು ಹಾವಿನ ರಕ್ತವನ್ನು ಆಹಾರವಾಗಿ ಸೇವಿಸಿದ್ದನ್ನು ನಾನು ಕೇಳಿದ್ದೇನೆ. ಬಹುಶಃ ಅದು ಅವರ ಸಿದ್ಧತೆಯ ಧಾಟಿಯಾಗಿದ್ದು, ಅದರಿಂದ ನನ್ನನ್ನು ಸೋಲಿಸಬಹುದೆಂದು ಭಾವಿಸಿದ್ದಾರೆ. ಆದರೆ ದೇಸಿ ತುಪ್ಪ ಹೊಂದಿದ ಸಾಮಾನ್ಯ ಆಹಾರವು ನನ್ನ ಮುಷ್ಠಿಗಳಲ್ಲಿ ಸಾಕಷ್ಟು ಶಕ್ತಿ ತುಂಬಿ ಅವರನ್ನು ಸೋಲಿಸಲು ಸಾಕಾಗುತ್ತದೆ ಎಂದು ಮ್ಯಾಂಚೆಸ್ಟರ್ನಲ್ಲಿ ವಿಜೇಂದರ್ ತಿರುಗೇಟು ನೀಡಿದ್ದಾರೆ.