ಐಪಿಎಲ್ ಪಂದ್ಯಗಳ ತೀಕ್ಷ್ಣ ಟೀಕಾಕಾರರಾದ ಅವರು ಭಾರತದ ನಾಚಿಕೆಗೇಡಿನ ಪ್ರದರ್ಶನವನ್ನು ಹಳಿಯಲು ಎಲ್ಲಾ ಪದಗಳನ್ನು ಬಳಸಿದರು. ಭಾರತ ಕಳಪೆ ಆಟದಲ್ಲಿ ಗರಿಷ್ಠ ಮಟ್ಟವನ್ನು ಮುಟ್ಟಿದೆ ಎಂದೂ ಅವರು ಹೇಳಿದರು. ಯಾವುದೇ ಯೋಜನೆ ಯಾವುದೇ ಕಾರ್ಯತಂತ್ರವಿರಲಿಲ್ಲ. ಐಪಿಎಲ್ ಮಾದರಿಯಲ್ಲಿ ಟೆಸ್ಟ್ ಕ್ರಿಕೆಟ್ ನೋಡುವುದು ನೋವಿನ ಸಂಗತಿಯಾಗಿದೆ. ಭಾರತದ ಹೀನಾಯ ಪ್ರದರ್ಶನಕ್ಕೆ ಐಪಿಎಲ್ ಮುಖ್ಯ ಕಾರಣ ಎಂದು ಬೇಡಿ ವಿಶ್ಲೇಷಿಸಿದರು.
ಭಾರತ ಐದನೇ ಟೆಸ್ಟ್‌ನ ಎರಡನೇ ಇನ್ನಿಂಗ್ಸ್‌ನಲ್ಲಿ ಕೇವಲ 94 ರನ್‌ಗೆ ನಾಟಕೀಯ ಕುಸಿತ ಅನುಭವಿಸಿ, ಅವಮಾನಕರ ಇನ್ನಿಂಗ್ಸ್ ಸೋಲನ್ನು ಅನುಭವಿಸಿದೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ ಚಿನಕುರಳಿಯಾದ ಬಾಂಗ್ಲಾದೇಶ ಕೂಡ ದೀರ್ಘ ಸ್ವರೂಪದ ಆಟದಲ್ಲಿ ಭಾರತಕ್ಕೆ ಸವಾಲು ನೀಡುವ ದಿನಗಳು ದೂರವಿಲ್ಲ ಎಂದು ಹೇಳಿದರು. ಬೇಡಿ ಅಭಿಪ್ರಾಯಕ್ಕೆ ದನಿಗೂಡಿಸಿದ ಮಾಜಿ ಎಡಗೈ ಸ್ಪಿನ್ನರ್ ರಾಜು ಬಿಗಿಯಾದ ಅಂತಾರಾಷ್ಟ್ರೀಯ ವೇಳಾಪಟ್ಟಿಯಿಂದ ಭಾರತಕ್ಕೆ ದೇಶೀಯ ಕ್ರಿಕೆಟ್‌ನಲ್ಲಿ ಹೆಚ್ಚು ಕಾಲ ಆಡಲು ಅವಕಾಶ ಸಿಗುತ್ತಿಲ್ಲದಿರುವುದು ಹೀನಾಯ ಸೋಲಿಗೆ ಕಾರಣ ಎಂದು ಹೇಳಿದರು.
ಪ್ರಸಕ್ತ ದೇಶೀಯ ಕ್ರಿಕೆಟ್‌ಗೆ ಜಾಗವೇ ಸಿಗುತ್ತಿಲ್ಲ. ಆಟಗಾರರು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡುವುದರಲ್ಲಿ ಹೆಚ್ಚು ಬಿಜಿಯಾಗಿದ್ದಾರೆ. ಇದರಿಂದ ಗುಣಮಟ್ಟ ತಗ್ಗಿದೆ ಎಂದು ಹೇಳಿದರು. ನಮ್ಮ ಕಾಲದಲ್ಲಿ ಹೆಚ್ಚು ದೇಶೀಯ ಕ್ರಿಕೆಟ್ ಆಡುತ್ತಿದ್ದು, ಅದು ನಿಜವಾಗಲೂ ನೆರವಾಗಿತ್ತು ಎಂದು ನುಡಿದರು. ಬೇಡಿ ಮತ್ತು ರಾಜು ಭಾರತದ ತಂಡ ಕಳಪೆ ಸಿದ್ಧತೆ ಮಾಡಿಕೊಂಡಿದೆಯೆಂದು ದೂರಿದ್ದು, ಐದು ಟೆಸ್ಟ್ ಪಂದ್ಯ ಸರಣಿಯ ತೀಕ್ಷ್ಣತೆಯನ್ನು ಸಹಿಸುವ ಮೂಲತಂತ್ರಗಳ ಕೊರತೆಯನ್ನು ಹೊಂದಿದೆ ಎಂದು ಹೇಳಿದರು.
