ಹಾಡಿನ ಸಾಲು ನೆನಪಿಸಲು ಪಂದ್ಯವನ್ನೇ ನಿಲ್ಲಿಸಿದ್ದರಂತೆ ವೀರೇಂದ್ರ ಸೆಹ್ವಾಗ್ !
ಗುರುವಾರ, 24 ನವೆಂಬರ್ 2016 (13:46 IST)
ನವದೆಹಲಿ: ಈ ಸುದ್ದಿ ಓದಿದರೆ ಹೀಗೂ ಉಂಟೇ ಎಂದು ನಿಮಗೆ ಅನಿಸಿದರೆ ಆಶ್ಚರ್ಯವಿಲ್ಲ. ತಾವು ಎರಡನೇ ತ್ರಿಶತಕ ಬಾರಿಸಿದ ಪಂದ್ಯ ನಡೆಯುವಾಗ ಹಾಡಿನ ಸಾಲೊಂದು ಮರೆತು ಹೋಯಿತೆಂದು ಪಂದ್ಯವನ್ನೇ ನಿಲ್ಲಿಸಿದ್ದರಂತೆ ವೀರೇಂದ್ರ ಸೆಹ್ವಾಗ್!
ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು ಇಂತಹದ್ದೊಂದು ವಿಶಿಷ್ಟ ಸಂಗತಿಯನ್ನು ಹೊರಹಾಕಿದ್ದಾರೆ. 2008 ರಲ್ಲಿ ಚೆನ್ನೈಯಲ್ಲಿ ದ.ಆಫ್ರಿಕಾ ವಿರುದ್ಧ ಸೆಹ್ವಾಗ್ ವೃತ್ತಿ ಜೀವನದ ಎರಡನೇ ತ್ರಿಶತಕ ದಾಖಲಿಸಿದ್ದರು. ಆ ಪಂದ್ಯದಲ್ಲಿ ಅವರು ಬ್ಯಾಟಿಂಗ್ ಮಾಡುತ್ತಿದ್ದಾಗ ಅವರು ತೂ ಜಾನೇನಾ ಎಂಬ ಹಿಂದಿ ಹಾಡು ಗುನುಗುತ್ತಿದ್ದರಂತೆ. ಆದರೆ ಇದ್ದಕ್ಕಿದ್ದಂತೆ ಅವರಿಗೆ ಮುಂದಿನ ಸಾಲು ಯಾವುದು ಎಂದು ನೆನಪಾಗಲಿಲ್ಲವಂತೆ.
ಅದಕ್ಕೆ ಅವರೇನು ಮಾಡಿದರು ಗೊತ್ತೇ? ಆಡುವುದನ್ನೇ ನಿಲ್ಲಿಸಿ ಮೈದಾನದ ಹೊರಗಿದ್ದ ಇಶಾಂತ್ ಶರ್ಮಾರನ್ನು ಕರೆಸಿಕೊಂಡರಂತೆ. ತಮ್ಮ ಐಪಾಡ್ ನೋಡಿ ಹಾಡಿನ ಸಾಲು ತಿಳಿದುಕೊಂಡು ಬರಲು ಕಳುಹಿಸಿದರಂತೆ. ಅದನ್ನು ಇಶಾಂತ್ ಶಿರಸಾವಹಿಸಿ ಪಾಲಿಸಿದರು ಎಂದೂ ವೀರೂ ಹೇಳಿಕೊಂಡಿದ್ದಾರೆ.
ಈಗ ಹೇಳಿ ಇದನ್ನು ಓದಿದ ಮೇಲೆ ಹೀಗೂ ಉಂಟೇ ಅನಿಸದೇ ಇರುವುದೇ?
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ
