‘ವೃದ್ಧಿಮಾನ’ನಿಗೂ ‘ಸಹಾ’ ಒಲಿಯಿತು ಶತಕ! ಡಿಕ್ಲೇರ್ ಮಾಡಿದ ಟೀಂ ಇಂಡಿಯಾ

ಹೈದರಾಬಾದ್: ಬಾಂಗ್ಲಾದೇಶ ಸರಣಿ ಆರಂಭಕ್ಕೆ ಮೊದಲು ಪಾರ್ಥಿವ್ ಪಟೇಲ್ ರನ್ನು ಆಯ್ಕೆ ಮಾಡಬೇಕೋ, ವೃದ್ಧಿಮಾನ್ ಸಹಾರನ್ನು ಪರಿಗಣಿಸಬೇಕೋ ಎಂದು ಚರ್ಚೆಯಾಗಿತ್ತು. ಕೊನೆಗೂ ಆಯ್ಕೆ ಸಮಿತಿಯ ತೀರ್ಮಾನವನ್ನು ಸಮರ್ಥಿಸಿಕೊಳ್ಳುವಂತಹ ಆಟ ವೃದ್ಧಿಮಾನ್ ಬ್ಯಾಟ್ ನಿಂದ ಇಂದು ಹರಿದು ಬಂತು.

ಐದನೇ ಕ್ರಮಾಂಕದಲ್ಲಿ ಆಡಲಿಳಿದು ತಂಡಕ್ಕೆ ವೇಗವಾಗಿ ರನ್ ಗಳಿಸುವ ಕೆಲಸ ಅವರದಾಗಿತ್ತು. ಅದನ್ನವರು ಇಂದು ಸಮರ್ಥವಾಗಿ ನಿಭಾಯಿಸಿದರು. ಬಾಂಗ್ಲಾ ಬೌಲರ್ ಗಳನ್ನು ಸಲೀಸಾಗಿ ಎದುರಿಸಿದ ಅವರು ಶತಕ (106 ರನ್) ದಾಖಲಿಸಿದರು. ಇದು ಅವರ ವೃತ್ತಿ ಜೀವನದ 2 ನೇ ಶತಕವಾಗಿತ್ತು. ಇದನ್ನು ಅವರು ಸಿಕ್ಸರ್ ಮೂಲಕ ಪೂರೈಸಿದ್ದು ವಿಶೇಷವಾಗಿತ್ತು.

ಇನ್ನೊಂದು ತುದಿಯಲ್ಲಿದ್ದ ರವೀಂದ್ರ ಜಡೇಜಾ ಕೂಡಾ ಅತ್ಯುತ್ತಮವಾಗಿ ಪರಿಸ್ಥಿತಿಗೆ ತಕ್ಕ ಹಾಗೆ ವೇಗವಾಗಿ ರನ್ ಗಳಿಸಿ ಅರ್ಧಶತಕ (60 ರನ್) ದಾಖಲಿಸಿದರು. ಬಹುಶಃ ಇನ್ನೂ ಸ್ವಲ್ಪ ಹೊತ್ತು ಬ್ಯಾಟಿಂಗ್ ಮಾಡುತ್ತಿದ್ದರೆ ಅವರೂ ಶತಕ ಗಳಿಸುತ್ತಿದ್ದರೇನೋ. ಆದರೆ ಇಂದಿನ ದಿನ ಸ್ವಲ್ಪ ಹೊತ್ತಾದರೂ ಬಾಂಗ್ಲಾದೇಶವನ್ನು ಬ್ಯಾಟಿಂಗ್ ಗೆ ಇಳಿಸಬೇಕೆಂದು ತಂಡದ ಲೆಕ್ಕಾಚಾರವಾಗಿತ್ತೆನಿಸುತ್ತದೆ. ಅದಕ್ಕೇ ತಂಡ 6 ವಿಕೆಟ್ ಕಳೆದುಕೊಂಡು 687 ರನ್ ಗಳಿಸಿದಾಗ ಇನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು.

ಇದರೊಂದಿಗೆ ಭಾರತ ಸತತ ಮೂರು ಬಾರಿ 600 ಪ್ಲಸ್ ರನ್ ಪೇರಿಸಿದ ಸಾಧನೆ ಮಾಡಿತು. ಭಾರತದ ಪರ ಮೂವರು ಶತಕ ಹಾಗೂ ಮೂವರು ಅರ್ಧಶತಕ ಗಳಿಸಿದರು.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ