ಸೌದಿ ಮಾಲೀಕನ ಚಿತ್ರಹಿಂಸೆಗೆ ಹೈದರಾಬಾದ್ ಯುವತಿ ಬಲಿ

ಸೌದಿ ಅರೇಬಿಯಾದಲ್ಲಿ ಪರಿಚಾರಿಕೆಯಾಗಿ ಕೆಲಸ ಮಾಡುತ್ತಿದ್ದ ಯುವತಿಯೊಬ್ಬಳಿಗೆ ಅವಳ ಮಾಲೀಕ ನೀಡಿದ ಚಿತ್ರಹಿಂಸೆಯಿಂದ ಆಸ್ಪತ್ರೆಯಿಂದ ಮೃತಪಟ್ಟ ದಾರುಣ ಘಟನೆ ಸಂಭವಿಸಿದೆ. 25 ವರ್ಷದ ಅಸೀಮಾ ಖಾತೂನ್ ಡಿಸೆಂಬರ್‌ನಲ್ಲಿ ರಿಯಾದ್‌ಗೆ ಹೋಗಿದ್ದಳು. ಅವಳು ತನ್ನ ತಾಯಿಗೆ ಮಾಡಿದ ಕರೆಗಳಲ್ಲಿ ತನ್ನನ್ನು ಹೇಗೆ ಒತ್ತೆಯಾಳಿನಂತೆ ಇರಿಸಿಕೊಂಡು ಮಾನಸಿಕವಾಗಿ ಮತ್ತು ದೈಹಿಕವಾಗಿ ಮಾಲೀಕರು ಹಿಂಸೆ ನೀಡುತ್ತಿದ್ದಾರೆಂದು ವಿಸ್ತ್ರತವಾಗಿ ವಿವರಿಸಿದ್ದಳು. ಅವಳ ಮಾಲೀಕರ ಹೆಸರನ್ನು ಅಬ್ದುಲ್ ರಹಮಾನ್ ಅಲಿ ಮೊಹಮದ್ ಎಂದು ಗುರುತಿಸಲಾಗಿದೆ.

ನಾನು ನನ್ನ ಮಗಳನ್ನು ಕೆಲಸಕ್ಕಾಗಿ ವಿದೇಶಕ್ಕೆ ಕಳಿಸಿದೆ. ಅಲ್ಲಿಗೆ ತಲುಪಿದ ಕೂಡಲೇ ನನ್ನ ಮಗಳನ್ನು ಕೋಣೆಯೊಂದರಲ್ಲಿ ಕೂಡಿಹಾಕಲಾಯಿತು. ಅವಳಿಗೆ ಆಹಾರ ಕೂಡ ನೀಡಲಿಲ್ಲ. ಸಂಜೆಯವರೆಗೆ ಕೂಡಿಹಾಕಿ ನಂತರ ಬಾಗಿಲನ್ನು ತೆರೆದರು. ನನ್ನ ಪುತ್ರಿ ಆಗಾಗ್ಗೆ ಕರೆ ಮಾಡಿ ಅಳುತ್ತಿದ್ದಳು ಎಂದು ತಾಯಿ ಗೌಸಿಯಾ ಕಾತೂನ್ ಹೇಳಿದ್ದಾರೆ. 

ತೆಲಂಗಾಣ ಸರ್ಕಾರ ಆ ಯುವತಿಯನ್ನು ಮಾಲೀಕನ ಕೈಯಿಂದ ಮುಕ್ತಗೊಳಿಸುವಂತೆ ಕೋರಿ ಕೇಂದ್ರಕ್ಕೆ ಪತ್ರ ಬರೆದ ಮೂರು ದಿನಗಳಲ್ಲೇ ಯುವತಿ ಶವವಾಗಿದ್ದಳು. 

 ಕಾತೂನ್‌ ಉದ್ಯಮ ವೀಸಾ ಮೇಲೆ ರಿಯಾದ್‌ಗೆ ಪ್ರಯಾಣಿಸಿದ್ದು, ಮಧ್ಯಪ್ರಾಚ್ಯಕ್ಕೆ ಅಗ್ಗದ ಕಾರ್ಮಿಕರನ್ನು ಒದಗಿಸುವ ಭಾರೀ ದೊಡ್ಡ ಜಾಲವನ್ನು ನಡೆಸುವ ಏಜಂಟರು ಅವಳ ಪ್ರಯಾಣವನ್ನು ಆಯೋಜಿಸಿದ್ದರು.