ಇಮ್ರಾನ್ ಖಾನ್ ಪದಗ್ರಹಣ ಕಾರ್ಯಕ್ರಮಕ್ಕೆ ಭಾರತೀಯ ಕ್ರಿಕೆಟಿಗ!
ಗುರುವಾರ, 2 ಆಗಸ್ಟ್ 2018 (10:09 IST)
ಇಸ್ಲಾಮಾಬಾದ್: ಪಾಕಿಸ್ತಾನ ರಾಷ್ಟ್ರೀಯ ಚುನಾವಣೆಯಲ್ಲಿ ಬಹುದೊಡ್ಡ ಪಕ್ಷವಾಗಿ ಹೊರಹೊಮ್ಮಿ ಪ್ರಧಾನಿ ಪಟ್ಟದತ್ತ ಕಾಲಿಟ್ಟಿರುವ ಮಾಜಿ ಕ್ರಿಕೆಟಿಗ, ಪಿಟಿಐ ಅಧ್ಯಕ್ಷ ಇಮ್ರಾನ್ ಖಾನ್ ಪ್ರಧಾನಿಯಾಗಿ ಪ್ರಮಾಣ ವಚನ ಸ್ವೀಕರಿಸುವುದು ಬಹುತೇಕ ಖಚಿತವಾಗಿದೆ.
ಬಹುಮತವಿಲ್ಲದಿದ್ದರೂ ಪಕ್ಷೇತರರ ಸಹಾಯದೊಂದಿಗೆ ಇಮ್ರಾನ್ ಅಧಿಕಾರಕ್ಕೇರಲಿದ್ದಾರೆ. ಆಗಸ್ಟ್ 14 ರಂದು ಪಾಕಿಸ್ತಾನ ಅಧ್ಯಕ್ಷರ ಭವನದಲ್ಲಿ ಪ್ರಮಾಣ ವಚನ ಸ್ವೀಕರಿಸಲು ಇಮ್ರಾನ್ ಸಿದ್ಧತೆ ನಡೆಸಿದ್ದಾರೆ ಎನ್ನಲಾಗಿದೆ.
ಈ ಸಮಾರಂಭಕ್ಕೆ ಸಾರ್ಕ್ ರಾಷ್ಟ್ರಗಳ ನಾಯಕರನ್ನು ಇಮ್ರಾನ್ ಆಹ್ವಾನಿಸಲಿದ್ದಾರೆ ಎಂಬ ವರದಿಯಿತ್ತು. ಆದರೆ ಪ್ರಧಾನಿ ಮೋದಿ ಸೇರಿದಂತೆ ಸಾರ್ಕ್ ನಾಯಕರು ಆಗಮಿಸುತ್ತಾರೋ ಇಲ್ಲವೋ, ಭಾರತದ ಮಾಜಿ ಕ್ರಿಕೆಟಿಗ ನವಜೋತ್ ಸಿಂಗ್ ಸಿದು ಕಾರ್ಯಕ್ರಮದಲ್ಲಿ ಭಾಗವಹಿಸುವುದು ಬಹುತೇಕ ಖಚಿತವಾಗಿದೆ.
ಪಂಜಾಬ್ ಸರ್ಕಾರದ ಸಚಿವರೂ ಆಗಿರುವ ನವಜೋತ್ ಸಿಂಗ್ ಸಿದು ಇಮ್ರಾನ್ ಖಾನ್ ಸಮಕಾಲೀನ ಕ್ರಿಕೆಟಿಗರು. ಸಿದುಗೆ ಪಾಕ್ ನಿಂದ ಅಧಿಕೃತ ಆಹ್ವಾನ ಬಂದಿದ್ದು, ಇದನ್ನು ಅವರು ಸ್ವೀಕರಿಸಿದ್ದಾರೆ ಎನ್ನಲಾಗಿದೆ. ಅಲ್ಲದೆ, ಇಮ್ರಾನ್ ಖಾನ್ ವಿಶ್ವಾಸಾರ್ಹ ನಾಯಕ ಎಂದು ನವಜೋತ್ ಹೊಗಳಿದ್ದಾರೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್ ದುನಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿಕೊಳ್ಳಿ.
